निर्वाचनको समयमा भइरहेका श्रृङ्खलावद्ध बम विष्फोटनका घटनाहरुका बारेमा सरकारले औपचारिक रुपमा कुनै मुख खोलेको छैन । तर नेपाल प्रहरीले उक्त श्रृंखलावद्ध बम विष्फोटका घटनामा नेत्रविक्रम चन्द विप्लव नेतृत्वको नेपाल कम्युनिष्ट पार्टीको संलग्नता रहेको निष्कर्ष निकालेको छ ।
काठमाडौंको नक्शालस्थित प्रहरी प्रधान कार्यालयमा आयोजित पत्रकार सम्मेलनमा बोल्दै नेपाल प्रहरीका प्रवक्ता डीआइजी मनोज न्यौपानेले विष्फोटका घटनाहरुमा नेत्रविक्रम चन्द विप्लव नेतृत्वको नेपाल कम्युनिष्ट पार्टीको संलग्नता रहेको प्रारम्भिक अनुसन्धानबाट खुलेको बताए ।
प्रहरीका अनुसार विष्फोटसहितका निर्वाचनविरोधी गतिविधिमा संलग्न नेत्रविक्रम चन्द विप्लव नेतृत्वको नेपाल कम्युनिष्ट पार्टीका ६ सयजना कार्यकर्ता समेत पक्राउ परेका छन् । उनीहरुमाथि थप अनुसन्धान भइरहेको प्रहरीले जनाएको छ । निर्वाचनविरोधी गतिविधिमा संलग्न सिके राउतका १३ जना कार्यकर्ता समेत पक्राउ परेका छन् ।
यसैबीच नेत्रविक्रम चन्द विप्लव नेतृत्वको नेपाल कम्युनिष्ट पार्टीका पोलिटब्यूरो सदस्य ओमप्रकाश पुनले आफ्ना करीब तीनहजार नेता तथा कार्यकर्ताहरुलाई प्रहरीले गिरफ्तार गरेको दाबी गरेका छन् । उनले बुधबार साँझ आफ्नो फेसबुक स्टाटसमा यस्तो दाबी गरेका हुन् । उनले फेसबुक स्टाटसमा दलाल सत्ताकाबिरुद्ध आफ्ना नेता तथा कार्यकर्ता र आम नेपाली जनताले हिरासत र जेलबाट एक भएर लडेको पनि जिकिर गरेका छन् ।

उनले आफ्नो फेसबुक स्टाटसमा देशब्यापी भईरहेको बमविष्फोटनका घटनाहरु बारे केही बोलेका छैनन । तर उनले देशमा भएका र आफ्ना पार्टी संलग्न घटनाका बारेमा पार्टी महासचिव विप्लवले जिम्मेवारी लिने गरेको दाबी गरेपनि देशव्यपाी विष्फोटका बारेमा स्पष्ट केही बताएका छैनन् ।

नेपाल कम्युनिष्ट पार्टीका महासचिव नेत्रविक्रम चन्द विप्लवले नेपाल छाडेर भारतमा लुकेको भनी प्रहरीले गरेको दाबीलाई उनले ठाडै अस्वीकार पनि गरेका छन् । उनले आफ्नो फेसबुक स्टाटसमा नेकपाका नेता तथा कार्यकर्ताहरु अहिले पनि नेपाली भूमिमा नेपाली जनताको साथमा रहेको स्पष्ट पारेका छन् ।

उनले महासचिव विप्लवकाे नेतृत्वमा बैज्ञानिक समाजवाद स्थापनाकाे निम्ति एकीकृत जनक्रान्ति निरन्तर अघि बढिरहेको उल्लेख गर्दै सरकारले घोषणा गरेको चुनाव असफल भैसकेको बताएका छन् ।

निर्वाचन सुरक्षाका लागि सादा पोसाकका प्रहरीदेखि तालिमप्राप्त कुकुरसम्म

नेपाल प्रहरीले प्रतिनिधिसभा र प्रदेशसभा चुनावका लागि सबै सुरक्षा व्यवस्था चुस्त पारिएको जानकारी दिएको छ । प्रहरीका अनुसार पहिलो चरणमा मतदान सम्पन्न भएका जिल्लाहरुमा मतपेटिका सुरक्षा र बिहीबार हुने दोस्रो चरणको निर्वाचनका लागि ९० प्रतिशत जनशक्ति परिचालन गरिएको छ । निर्वाचन सुरक्षाका लागि पहिलो घेरामा नेपाल प्रहरी, दोस्रो घेराना सशस्त्र प्रहरी र बाहिरी घेरामा नेपाली सेना तैनाथ गरिनेछ ।

सादा पोसाकका प्रहरीदेखि तालिमप्राप्त कुकुरको परिचालन चुनावी सुरक्षाका लागि गरिनेछ । त्यस्तै मतदानस्थलको सुरक्षाका लागि आवश्यक जनशक्ति, हतियार र साधन स्रोतको परिचालन सम्पन्न भइसकेको छ ।

सुरक्षा अनुगमनका लागि डिएसपीको कमाण्डमा रहेका जिल्लाहरुमा एसपी, एसपीको कमाण्डमा रहेका जिल्लाहरुमा एसएसपी र एसएसपीको कमाण्डमा रहेका जिल्लाहरुमा डिआईजी खटाइएको छ ।

सुरक्षाका लागि केन्द्र र हरेक प्रदेशमा हेलिकोप्टर तयारी अवस्थामा राखिएको नेपाल प्रहरीका प्रवक्ता मनोज न्यौपानले बुधबार आयोजित पत्रकार सम्मेलनमा जानकारी दिए ।