नयाँ दिल्ली/गुरुग्राम,८ साउन २०८३। — सामाजिक अभियन्ता तथा शिक्षा सुधारका अभियन्ता सोनम वाङचुकले भारत सरकारबाट शिक्षा प्रणाली सुधार र आन्दोलनमा सहभागी विद्यार्थीहरूमाथि दण्डात्मक कारबाही नगर्ने प्रतिबद्धता प्राप्त भएपछि आफ्नो २६ दिन लामो आमरण अनशन अन्त्य गरेका छन्।
गुरुग्रामस्थित मेदान्ता अस्पतालमा उपचाररत वाङचुकले केन्द्रीय स्वास्थ्यमन्त्री जेपी नड्डा र प्रधानमन्त्री कार्यालयका राज्यमन्त्री डा. जितेन्द्र सिंहसँग भएको भेटवार्तापछि जुस पिएर अनशन तोडेका हुन्। भेटका क्रममा लेह–लद्दाखको एपेक्स बडीका वरिष्ठ प्रतिनिधिहरू पनि उपस्थित थिए।
वाङचुकले सामाजिक सञ्जालमार्फत आफूले शान्तिपूर्ण आन्दोलनमा सहभागी विद्यार्थी र प्रदर्शनकारीविरुद्ध कुनै कानुनी वा प्रतिशोधात्मक कारबाही नहुने सरकारी आश्वासन पाएपछि अनशन अन्त्य गर्ने निर्णय गरेको बताएका छन्। उनले आन्दोलनका क्रममा देखिएको तनाव थप नबढोस् र देशमा हिंसात्मक अवस्था सिर्जना नहोस् भन्ने उद्देश्यले पनि यो निर्णय लिएको उल्लेख गरेका छन्।
उनको आमरण अनशन राष्ट्रिय प्रवेश परीक्षा (NEET) को प्रश्नपत्र चुहावट, परीक्षा प्रणालीमा देखिएका अनियमितता तथा शिक्षा क्षेत्रमा व्यापक सुधारको मागसँग जोडिएको थियो। वाङचुकले परीक्षा प्रणालीलाई पारदर्शी र विश्वसनीय बनाउन संस्थागत सुधार, दोषीमाथि कडा कारबाही तथा भविष्यमा यस्ता घटना दोहोरिन नदिन प्रभावकारी संयन्त्र बनाउन सरकारसँग माग गरेका थिए।
सरकारका तर्फबाट केन्द्रीय मन्त्री जेपी नड्डा र डा. जितेन्द्र सिंहले विद्यार्थीहरूको जायज चिन्ता सम्बोधन गर्न सरकार प्रतिबद्ध रहेको, शिक्षा प्रणाली सुधारका विषयमा आवश्यक कदम चालिने तथा शान्तिपूर्ण आन्दोलनमा सहभागी विद्यार्थीहरूमाथि प्रतिशोधात्मक कारबाही नगरिने आश्वासन दिएका थिए। त्यसपछि वाङचुकले आफ्नो आन्दोलनलाई तत्कालका लागि स्थगित गर्दै अनशन अन्त्य गरेका हुन्।
अनशन तोड्दै वाङचुकले आन्दोलनको उद्देश्य सरकारसँग टकराव सिर्जना गर्नु नभई शिक्षा प्रणालीमा सुधार ल्याउनु रहेको बताए। उनले सरकारसँग भएका प्रतिबद्धताहरू कार्यान्वयन भए/नभएको निरन्तर निगरानी गरिने र आवश्यक परे भविष्यमा पुनः लोकतान्त्रिक माध्यमबाट आवाज उठाइने पनि स्पष्ट पारे।
