त्रिभुवन विश्वविद्यालयका उपकुलपति तीर्थ खनियाँको घर घेराउ गर्न गएकाहरुलाई प्रहरीले गिरफ्तार गरेको छ ।
अनसनरत डाक्टर गोविन्द केसीको विरोध हुुँदा हुँदै पनि खनियाँले आफू खुसी शिक्षण अस्पताल हाराजगञ्जका डिन नियुक्त गरेको भन्दै युवाहरु कालिमाटीमा रहेको खनियाँको घर घेराउ गर्न पुगेका थिए ।
उनीहरुलाई अहिले महानगरीय प्रहरी वृत्त कालिमाटीमा राखिएको बताइएको छ । डा. गोविन्द केसीका समर्थकहरुले त्रिवि उपकुलपति खनियाँलाई बर्खास्त गर्न माग गर्दै प्रदर्शन गरेका थिए ।
आइओएममा वरिष्ठताका आधारमा डिन नियुक्ति गर्नुपर्ने लगायतका मागहरु राखेर डा. केसी अनसनमा बसेका छन् ।
त्रिभुवन विश्वविद्यालयले डा. केपी सिंहलाई डिन नियुक्त गरे पनि डा. केसीले वरिष्ठताको आधारमा नियुक्त नगरिएको भन्दै अनसन जारी राखेका छन् । उनको स्वास्थ्य विग्रिँदै गए पनि सरकारले समस्या समाधानका लागि पहल नगरेको केसीका समर्थकहरुको आरोप छ ।
