ट्रकले पोल ढाल्दा जलेर मृत्यु भएका ललितपुर टीकाथली–१० का रमेश श्रेष्ठका आफन्त र गाउँलेमाथि प्रहरीले लाठीचार्ज गरेको थियो । श्रेष्ठको मृत्यु भएपछि प्रहरीले परिवारलाई क्षतिपूर्ति दिलाउन समन्वय नगरेको भन्दै आफन्त र गाउँलेहरुले आज महानगरिय प्रहरी बिट सातदोबाटो घेराउ गरेका थिए ।
शनिबार राति ना २ ख ३२३२ नम्बरको ईट्टा बोकेको ट्रकले टीकाथलीमा ठक्कर दिएर बिद्युत पोल ढालेपछि मोटरसाइकलमा सवार स्थानीय महेश श्रेष्ठको करेन्ट लागेर मृत्यु भएको थियो । बा ३९ प २०४० नम्बरको मोटरसाइकलमा सवार श्रेष्ठको शव अहिले पनि इमाडोलस्थित किष्ट अस्पतालमा छ ।
आफन्तले उचित क्षतिपूर्ति नपाएसम्म शव नबुझ्ने बताएका छन् । मृतकका भाई महेश श्रेष्ठले महेशका ६ महिने छोराको उचित लालनपालनको व्यवस्था र क्षतिपूर्ति नदिइएसम्म शव नबुझ्ने बताए । सातदोबाटो प्रहरी बिटका प्रहरी नायब उपरीक्षक रामेश्वर यादवले कानुनी प्रक्रिया अनुसार चालकलाई कडा कारबाही गर्न प्रहरी प्रतिबद्ध रहेको बताए । उनले दुर्घटना गराउने ट्रक चालकलाई नियन्त्रणमा लिइएको र क्षतिपूर्तिको लागि नारायणी यातायात व्यवासायी संघसँग कुराकानी भइरहेको बताए । प्रहरीको लाठीचार्जबाट केही सामान्य घाइते छन् ।
