पाल्पा,१९ माघ ।
जिल्ला वन कार्यालय पाल्पाले डढेलो नियन्त्रण अभियान सुरु गरेको छ । गएवर्ष डढेलोबाट भएको क्षतिलाई मध्यनजर गर्दै सामुदायिक वनका उपभोक्ता, जिल्लाका सुरक्षा निकाय, गाउँका जिम्मेवार व्यक्तिलाई साथमा लिएर वन कार्यालयले डढेलो नियन्त्रण अभियान सुरु गरेको हो ।
गएको वर्ष आगोलागीबाट पाल्पामा दुई जनाको ज्यान गएको थियो । यस्तै १२७ वटा सामुदायिक वन तथा निजी खेतबारी गरी झण्डै १४ हजार हेक्टर जमिनमा आगलागी भएको थियो । हुमिन, भैरवस्थान, पोखराथोक लगायतका बस्तीमा आगोले करोडौंको नोक्सान भएको थियो ।
वन कार्यालयले पहिलो चरणमा सदरमुकाम तानसेन आसपासका वनजंगल र बस्तीलाई समेटेर डढेलो नियन्त्रण अभियान सुरु गरेको हो ।
