महिला भएकैकारण गाउँपालिका उपाध्यक्षमाथि विभेद, कार्यबाहक अध्यक्ष पाइनन्

संबाददाता : ओम हमाल     प्रकाशित मिति: (२०७५ श्रावण ३१, बिहीबार) ०६:३३

महिला भएकैकारण सप्तरी जिल्लाको अग्निसाइर कृष्णासावरण गाउँपालिकाकी उपाध्यक्ष मीना चौधरी गाउँपालिकाको कार्यबाहक अध्यक्ष हुन बन्चित भएकी छिन । अग्निसाइर कृष्णासावरण गाउँपालिकाका अध्यक्ष परशुराम चौधरी तीन दिन अघि भारतमा करिब दुर्इ साताका लागि तीर्थ गर्न गएका छन् ।

कुनै पनि गाउँपालिकाको अध्यक्ष अनुपस्थित हुँदा उपाध्यक्षलाई कार्यभार दिनुपर्ने कानूनी प्रावधान छ । तर, कार्यवाहक अध्यक्षको जिम्मेबारी भने उनले उपाध्यक्ष मीना चौधरीलाई नदिई वडा नम्बर ४ का वडाअध्यक्ष तेजनारायण यादवलाई लेखेर दिएका छन् ।

आफू कार्यालयमा नियमितरुपमा आइरहे पनि अध्यक्षले नियम विपरीत आफूभन्दा जुनियर वडाअध्यक्षलाई कार्यवाहक अध्यक्षको जिम्मेवारी दिएको भन्दै उपाध्यक्ष मीना जनकपुर उच्च अदालत पुगेकी छिन् । उनीसंगै वडा नम्बर ६ की अध्यक्ष कुसुम आचार्य  पनि आफूमाथि गाउँपालिका अध्यक्ष पर्शुराम चौधरीबाट विभेदपूर्ण व्यवहार भएको भन्दै जनकपुर उच्च अदालत पुगेकी छिन् ।

गाउँपालिका अध्यक्ष चौधरी नेपाली कांग्रेसबाट निर्वाचित जनप्रतिनिधि हुन् । उपाध्यक्ष मीनाले पनि कांग्रेसबाटै चुनाव जितेकी हुन् ।  उपाध्यक्ष मीनासँगै अदालत जाने वडाध्यक्ष कुसुम भने एमालेबाट निर्वाचित जनप्रतिनिधि हुन् । उनले पनि अध्यक्ष चौधरीबाट गाउँपालिकामा मनपरि ढंगकाबाट अधिकारको दुरुपयोग भएको भन्दै मीनालाई साथ दिइरहेको बताइएको छ ।
राजस्व परामर्श समितिको अध्यक्षको हैसियतले मीनाले तयार पारेको प्रतिवेदन अध्यक्षले च्यातेको र कर्मचारीहरुसँग मिलेर गाउँपालिकाको सम्पत्ति जथाभावी खर्च गरिरहेको आरोप अध्यक्ष पर्शुराम चौधरीमाथि लागेको छ l

गाउँ पालिकाको उपाध्यक्षको काम भनेको स्थानीयवासीका मुद्दा मामिला हेर्ने र झगडा मिलाउने हो । तर, यस्तो न्यायिक अधिकार हातमा लिएकी अग्निसाइर कृष्णासावरण गाउँपालिकाकी उपाध्यक्ष मीना चौधरी आफूमाथि लिङ्गीय विभेद भएको भन्दै जनकपुर उच्च अदालत पुगेकी छिन् ।

अध्यक्षले मनोमानी गरेको भन्दै उपाध्यक्ष चौधरी आक्रोशित भएकी छन् । उनले अध्यक्षले आˆनो अपमान गरेको बताएकी छन् । उपाध्यक्ष चौधरीले अध्यक्षले यसअघि पनि मनोमानी तरिकाले काम गरेर आफूलाई वाइपास गरेको बताइन् ।

स्थानीय सरकार सञ्चालन ऐन ०७४ विपरीत अध्यक्षले गलत निर्णयहरु गरेको र पटक-पटक यसबारे ध्यानाकर्षण गराए पनि ध्यान नदिएको मीनाले बताइन् ।

गलत निर्णयको बिरोध गरेकै कारण आफूलाई कार्यभार नदिई वडाअध्यक्षलाई दिएको उनले सुनाइन् । अध्यक्षवाट पटक-पटक आफूलाई अधिकारवाट वञ्चित गराउने र मानमर्दन हुने ब्यवहार भइरहेको भन्दै उनले अमानवीय तथा कानुन विपरीतका क्रियाकलापहरु गाउँपालिकामा भइरहेको बताइन् ।


(२०७५ श्रावण ३१, बिहीबार) ०६:३३ मा प्रकाशित

Exchange Rate

Nepali Patro