पोखरा , ६ बैशाख २०८३।
पोखराको लेकसाइड क्षेत्रमा पर्यटकलाई दुःख दिने गतिविधिमा संलग्न रहेको आरोपमा प्रहरीले १६ जना महिलालाई नियन्त्रणमा लिएको छ ।
प्रहरीका अनुसार ती महिलाहरूले विशेषगरी रातिको समयमा आन्तरिक तथा बाह्य पर्यटकलाई अनावश्यक हैरानी दिने, लुटपाट गर्ने तथा अनैतिक क्रियाकलापमा संलग्न हुने गरेको जनगुनासो आएपछि कारबाही गरिएको हो ।
जिल्ला प्रहरी कार्यालय कास्की र वडा प्रहरी कार्यालय बैदामबाट खटिएको संयुक्त टोलीले वैशाख ५ गते मध्यराति साढे १२ बजेदेखि वैशाख ६ गते बिहान २ बजेसम्म सञ्चालन गरेको अभियानका क्रममा उनीहरूलाई पक्राउ गरिएको हो ।
नियन्त्रणमा लिइएका १६ जना महिलामाथि आवश्यक अनुसन्धान तथा कारबाही प्रक्रिया अघि बढाइएको जिल्ला प्रहरी कार्यालय कास्कीका निमित्त सूचना अधिकारी तथा प्रहरी निरीक्षक गणेश पाण्डेले जानकारी दिएका छन् ।
