सरकारका मन्त्रीहरुको फुटबल हेराई महंगो भएको छ । प्रधानमन्त्री केपी शर्मा ओलीले आर्थिक अनुशासनको नारा दिइरहेपनि मन्त्रीलाई त्यसले कुनै प्रभाव पारेको छैन । मन्त्रीहरुको जीवनशैली दिनदिनै तडकभडक बन्दै गइरहेको छ ।
आइतबार राति भएको विश्वकप फुटबल हेर्न मन्त्रीहरुको लाइन फाइभ स्टार होटलमा लाग्यो । फुटबल सुरु नहुँदै मन्त्रीहरु याक एण्ड यति मा महंगो शूल्क तिरेर फुटबल हेरेका छन् । आफ्ना घरमा ठूलाठूला टिभी राखेका मन्त्रीहरु फुटबल हेर्न फाइभस्टार होटल पुगेका छन् । कम्युनिस्ट मन्त्रीहरुको यो जीवनशैलीको चौतर्फी आलोचना भइरहेका छ ।
ऊर्जामन्त्री बर्षमान पुन, श्रम मन्त्री गोकर्ण विष्ट, उद्योगमन्त्री मात्रिका यादवसहित आधा दर्जन मन्त्रीहरु परिवार, एक हुल नेता–कार्यकर्ता र मन्त्रालयका अधिकारीलाई बोकेर याक एण्ड यती पुगेका थिए । उनीहरुसँगै (नेकपा)का नेता टोपबहादुर रायमाझी, धनश्याम भुसाल, पूर्वसभामुख ओनसरी घर्ती पनि पुगेकी थिइन् ।
फुटबल हेर्न मन्त्रीहरुसँग नेपाल विद्युत प्राधिकरणका कार्यकारी निर्देशक कुलमान घिसिङ पनि फुटवलमा रमाइरहेका थिए । उनीहरु सबैले अगाडिको भाग बुक गरेर फुटबल हेरेका थिए ।
मन्त्रीसँगै फुटवल हेर्न याक एण्ड यति पुगेकाहरुले महंगो खाले रक्सी खाँदै ‘गोल……..गोल….’ भन्दै कराएका थिए । फुटबल हेर्न त्यहाँ पुगेकाहरुका अनुसार मन्त्रीहरुले खानपान गरेको बताइएको छ ।
विश्वकप फुबटल– २०१८ को उपाधि फ्रान्सले जितेको छ । क्रोएसियालाई ४–२ ले हराउँदै उपाधि जितेको हो ।
