एकाबिहानै पोखरा महानगरपालिकाका थप नौ जना कोरोना संक्रमण पुष्टि भएको छ। गण्डकी प्रदेश स्वास्थ्य निर्देशनालाय पोखराले बुधबार बिहान जारी गरेको बिज्ञप्ति अनुसार, पोखरा महानगरपालिकाको वडा नम्बर ६ र १४ मा थप २/२ नयाँ कोरोना संक्रमित देखिएका छन् भने वडा नम्बर ७, ८. १३ र १७ मा थप १/१जनामा कोरोना संक्रमण पुष्टि भएको छ। थप एक जना संक्रमितको वार्ड खुलेको छैन।
नयाँ संक्रमित मध्ये पोखरा महानगरपालिका-१३ की ३८ बर्षीय महिला साउदी अरबबाट आएर क्वारेन्टाइनमा बसेकी थिइन भने पोखरा- १७ र वार्ड नम्बर नखुलेका २२ र २४ बर्षका २ जना पुरुष भारतबाट आई क्वारेन्टाइनमा बसेको बताइएको छ। नौ जना नयाँ संक्रमित मध्ये बाँकी छ जना भने कोरोना संक्रमितको सम्पर्कमा आएका व्यक्ति भएको गण्डकी प्रदेश स्वास्थ्य निर्देशनालयले जानकारी दिएको छ।
यसैबीच पछिल्लो जानकारी अनुसार, गण्डकी प्रदेशका दुई हजार छ सय ७२ जनामा कोरोना संक्रमण पुष्टि भएको छ भने २२ जना कोरोना संक्रमणका कारण मृत्यु भएको छ।
मृगौला फेल भएर डायलोसिस गराइरहेका नवलपुर जिल्ला, देवचुली नगरपालिका-१ का ६४ वर्षीय पुरुषमा कोरोना संक्रमण पुष्टि भएपछी भरतपुर अस्पताल, चितवनको कोविद -१९ आइ. सी.यु मा उपचार हुँदाहुँदै मृत्यु भएको छ।
