काठमाडौं– स्पेन र पोर्चुगलमा रोजगारीको लागि पठाउने भन्दै रकम असुलेर ठगी गर्ने सुनौलो प्रकाश कन्सल्टेन्सीका संचालक जिल्ला मकवानपुर भिमफेदी -१० स्थायी ठेगाना भई हाल का.जि.का.म.न.पा. -३ बस्ने ३१ बर्षका आर्यन लामालाई प्रहरीले पक्राउ गरेको छ ।
खोटाङ निर्मलीडाँडा -१ का हरिकाजी बस्नेतसलाइ रोजगारीको लागि पठाउने भनी ३३ लाख लिएको तर नपठाएपछि रकम माग गर्दा बाउन्स चेक दिएकाे पाइएसँगै उनी प्रहरीकहाँ पुगेका थिए ।
उजुरी परेसँगै महानगरीय अपराध महाशाखाबाट खटिएको प्रहरी टोलीले लामालाई काठमाडौंको टेकुबाट मंगलबार पक्राउ गरेको हो ।
अनुसन्धानको क्रममा लामाले दोलखाका मोहन प्रधान र कारसाङ तामाङलाई समेत कतार एयरवेजमा काम लगाउने भनी ३ लाख ५० हजार ठगेको खुल्न आएको प्रहरीले जनाएको छ ।
लामालाई ठगी गरेको सम्बन्धमा थप अनुसन्धान एवं कारवाहीको लागि महानगरीय प्रहरी परिसर काठमाण्डौमा पठाईएको जनाइएको छ ।
मुलुकी ऐन ठगी महल अनुसार ठगी गर्ने व्यक्तिलाई कसुरको मात्रा हेरी ५ वर्षसम्म कैद र विगो भराई विगो बमोजिम जरिवाना हुने व्यवस्था रहेको छ ।
