झापा, ३ कार्तिक २०८३।
झापाको जनताचोकमा मर्निङ वाकमा निस्किएका दुई वृद्ध-बृद्धाको हात्तीको आक्रमणबाट मृत्यु भएको छ।
एकाबिहानै झापाको बाह्रदशी गाउँपालिका–२ जनता चोकस्थित बस्तीमा प्रवेश गरेका दुईवटा जंगली हात्तीले बिरिङ खोला नजिकै र राजगढ–घेराबारी सडकखण्ड अन्तर्गत जनता चोकको दक्षिणतर्फ मर्निङ वाकमा निस्किएका उनीहरुलाई आज बिहान करिब ५:३० देखि ५:४० बजेको बीचमा आक्रमण गर्दा मृत्यु भएको हो।
जिल्ला प्रहरी कार्यालय झापाका अनुसार, मृत्यु हुनेमा बाह्रदशी–२ जनता बजारकी करिब ७० वर्षीया लजुमा खातुन (केही सञ्चारमाध्यममा नजमा खातुन भनिएको) र सोही वडाको चैतन्यबारी, खाडी गाउँका ७३ वर्षीय झप्टु राजवंशी (झक्कु राजवंशी) रहेका छन्।
इलाका प्रहरी कार्यालय राजगढ र जिल्ला प्रहरी कार्यालयका सूचना अधिकारी रञ्जन अवाका अनुसार, मर्निङ वाककै क्रममा बिरिङ खोला नजिक हात्तीले पहिला राजवंशीलाई आक्रमण गरेको थियो। त्यसको केहीबेरपछि सोही क्षेत्रमा हिँडिरहेकी खातुनलाई पनि हात्तीले आक्रमण गरेको हो। आक्रमणबाट दुवैजना गम्भीर घाइते भएका थिए।
गम्भीर घाइते खातुनलाई उपचारका लागि प्रादेशिक अस्पताल भद्रपुर लैजाने क्रममा बाटोमै मृत्यु भएको प्रहरीले जनाएको छ। केही रिपोर्टमा उनलाई बिर्तामोडस्थित बीएण्डसी अस्पताल लैजाने क्रममा मृत्यु भएको उल्लेख छ। उनको शव पोष्टमार्टमका लागि प्रादेशिक अस्पताल भद्रपुरमा राखिएको छ।
यस्तै गम्भीर घाइते राजवंशीलाई पनि बिरिङ खोला नजिकै आक्रमण गर्दा खुट्टामा गम्भीर चोट लागेको थियो। उनको पनि उपचारको क्रममा मृत्यु भएको प्रहरीको पछिल्लो विवरणमा उल्लेख गरिएको छ। जिल्ला प्रहरी कार्यालय झापाले घटनाबारे थप अनुसन्धान गरिरहेको जनाएको छ।
झापाको बाह्रदशी, हल्दिबारी, कचनकवल क्षेत्रमा पछिल्ला वर्षहरुमा जंगली हात्ती बस्तीमा पस्ने क्रम बढेको छ। बिहान–बेलुका मर्निङ वाक र खेतबारीमा जाँदा स्थानीय जोखिममा पर्ने गरेका छन्। प्रहरीले बिरिङ खोला आसपास र जनता चोक क्षेत्रमा सतर्कता अपनाउन र बिहान–बेलुका एक्लै बाहिर ननिस्कन आग्रह गरेको छ।
