काठमाण्डौ, ३ कार्तिक २०८३।
बलिउड अभिनेता टाइगर श्राफको गाडीमाथि गोली प्रहार गरेको घटनामा संलग्न रहेको आरोपमा तीन जना पक्राउ परेका छन्। भारतीय प्रहरीका अनुसार पक्राउ परेका अभियुक्तहरू दिल्ली हुँदै नेपाल भाग्ने तयारीमा थिए। उनीहरूलाई राजस्थानको कोटा रेलवे स्टेसनमा रेलबाट ओर्लने क्रममा नियन्त्रणमा लिइएको हो।
पक्राउ पर्नेमा हरियाणाको सोनीपतका १८ वर्षीय रेहान रहिउसुद्दिन अन्सारी, सोही जिल्लाका १८ वर्षीय फूल सिंह नरेश र बिहारको बेगुसरायका २२ वर्षीय ऋतिक कुर्मी उर्फ रोशन रहेका छन्।
प्रहरीको प्रारम्भिक अनुसन्धानअनुसार, अक्टोबर १८ मा मुम्बईको जुहू क्षेत्रमा टाइगर श्राफको गाडीमाथि गोली प्रहार भएपछि उनीहरू मोटरसाइकलमा भागेका थिए। त्यसपछि एन्डheri वेस्ट रेलवे स्टेसननजिक मोटरसाइकल छाडेर ट्याक्सीमार्फत सुरत पुगेका उनीहरू पुणे–जयपुर एक्सप्रेसमा चढेको बताइएको छ।
मुम्बई प्रहरीबाट प्राप्त सूचनाका आधारमा कोटा सिटी प्रहरीले रेलमा खोजी अभियान चलाएको थियो। करिब १५ मिनेटको खोजीपछि तीनै जनालाई पक्राउ गरिएको कोटा प्रहरी प्रमुख तेजस्विनी गौतमले बताएकी छन्।
प्रहरीका अनुसार उनीहरूको योजना जयपुर हुँदै दिल्ली पुगेर नेपाल प्रवेश गर्ने थियो। तर, गन्तव्यमा पुग्नुअघि नै उनीहरू पक्राउ परे।
कसको के भूमिका ?
प्रहरीको प्रारम्भिक दाबीअनुसार रेहान अन्सारी घटनामा मुख्य भूमिका खेलेको आशंकामा छन्। उनी अनिल पण्डितसँग Signal र Telegram जस्ता माध्यमबाट सम्पर्कमा रहेको अनुसन्धानमा खुलेको बताइएको छ।
त्यस्तै, फूल सिंह नरेशमाथि गोली प्रहारमा संलग्न रहेको आरोप छ। उनीमाथि यसअघि पनि सवारीसाधन चोरी तथा हतियारसम्बन्धी मुद्दा रहेको भारतीय सञ्चारमाध्यमले जनाएका छन्।
ऋतिक कुर्मी उर्फ रोशन केही वर्षदेखि मुम्बईमा बस्दै र्यापिडो बाइक ट्याक्सी चालकका रूपमा काम गर्दै आएको बताइएको छ। घटनापछि भाग्न प्रयोग गरिएको मोटरसाइकलको व्यवस्थापनमा उनको भूमिका रहेको आशंकामा प्रहरीले अनुसन्धान गरिरहेको छ।
लरेन्स बिश्नोई समूहसँग सम्बन्धबारे अनुसन्धान
घटनामा अनिल पण्डितको सम्भावित भूमिकाबारे पनि प्रहरीले अनुसन्धान गरिरहेको छ। उनी लरेन्स बिश्नोई समूहसँग सम्बन्धित रहेको बताइए पनि घटनामा उनको संलग्नता पुष्टि हुन बाँकी छ।
प्रहरीको प्रारम्भिक दाबीअनुसार रेहानले अनिल पण्डितसँग इन्क्रिप्टेड सन्देश आदानप्रदान गर्ने माध्यमबाट सम्पर्क गरेको र घटनासम्बन्धी विवरण तथा स्थानको जानकारी पठाएको आशंका छ। गोली प्रहारको योजना कसले बनाएको थियो, यसको उद्देश्य के थियो र अन्य व्यक्तिको संलग्नता छ कि छैन भन्ने विषयमा अनुसन्धान जारी छ।
घटनामा प्रयोग भएको भनिएको हतियार बरामद हुन बाँकी रहेको र त्यसको खोजी भइरहेको बताइएको छ। टाइगर श्राफ सुरक्षित रहेको जनाइएको छ भने घटनामा अन्य व्यक्ति घाइते भएको विवरण पनि भारतीय सञ्चारमाध्यममा प्रकाशित भएका छन्।
प्रहरीले पक्राउ परेका तीनै जनामाथि थप अनुसन्धान गरिरहेको छ। उनीहरूमाथिका आरोप अदालतबाट प्रमाणित भइसकेका छैनन्।
