लोकमानसिंह कार्कीलाई कालो मोसो दल्ने विप्लव माओवादीका दुई जना कार्यकर्ताहरुलाई सर्वोच्च अदालतले एक महिना जेल सजाय सुनाएको छ । पुस ८ गते अखिल क्रान्तिकारीका केन्द्रीय सदस्यद्वय प्रकाश शाही र चन्द्रप्रकाश बुढालाई न्यायाधीशद्वय आनन्दमोहन भट्टराई र अनिल सिन्हाको संयुक्त इजलासले एक महिना कैद सजाय सुनाएको हो । सर्वोच्चले आज जारी गरेएको आदेशमा भनिएको छ, “निजहरुलाई थुनामा राखेकै मितिबाट कैद कट्टा हुने गरी कैदी पूर्जी दिई कैदमा राख्न जिल्ला कारागार कार्यालय काठमाडौँमा पठाइदिने ।”
अदालत पुगेका कार्कीलाई शाही र बुढाले यही पुस ८ गते कालो मोसो दलेर दुर्व्यवहार गरेका थिए । त्यसलगत्तै भ्रष्टाचारीलाई कारबाही गर भन्दै नारा लगाएका उनीहरुलाई सुरक्षाकर्मीहरुले नियन्त्रणमा लिएका थिए । लोकमान सिंह कार्कीले भने विज्ञप्ति निकालेर ‘उनीहरु कारिन्दा हुन् छाड्दिनू’ भन्ने प्रतिक्रिया दिएका थिए ।
पूर्वघोसित कार्यक्रम अन्तर्गत नै हडताल भएपनि आजमात्रै सर्वोच्च अदालतले आफ्ना नेताहरुलाई एक महिना कैद हुने आदेश जारी गरेपछि संगठन झन आक्रोशित बनेको छ । आफ्ना कार्यकर्ता तत्काल रिहा नगरे संगठन तत्काल कडाभन्दा कडा कदम उठाउन बाध्य हुने क्रान्तिकारीको चेतावनी छ ।
अदालतमा मुद्दाको तारिक लिन जाँदा गत ७ गते शाही र बुढाले अदालत परिसरमै कार्कीलाई कालोमोसो दलेका थिए । सोही दिन नै पक्राउ गरी दुवैलाई थुनामा राखिएका द्वयलाई अदालतको अवहेलनाअन्तर्गत मुद्दा चलाइएको थियो ।
