पोखरा, २९ भदौ २०८२।
लमजुङमा आज दिउसो बोलेरो जिप दुर्घटना हुँदा सात जना घाइते भएका छन् ।
दोर्दी गाउँपालिका-६, ताजेगाउँबाट सदरमुकाम बेसीशहरतर्फ आउदै गरेको ग१ज ७५५५ नम्बरको जिप दोर्दी–६ ढुङगेखोला (छोटेखोला) सडक खण्डमा आइतबार बिहान साढे ९ बजेतिर दुर्घटनाग्रस्त हुँदा सात जना घाइते भएका हुन्।
उक्त जिप दुर्घटनामा परि दोर्दी गाउँपालिका-६, ताजेगाउँ बस्ने ४४ वर्षीय मैती कुमारी तामाङ, सोही स्थानका ५८ वर्षीय लाल बहादुर तामाङ,२३ वर्षीय नबिन्द्र घले, २१ वर्षीय घिसे लामा, ३४ वर्षीय हरिमाया तामाङ, ३० वर्षीय खुसी माया घले र ४२ वर्षीय ठगम घले घाइते भएको प्रहरीले जनाएको छ ।
प्रहरीका अनुसार घाइतेहरुको ढाड, टाउको, हात, घाँटी र खुट्टामा चाेट देखिएको छ । प्रहरीका अनुसार घाइतेहरूमध्ये तीन जनाको अवस्था मध्यम र बाँकी चार जनाको अवस्था सामान्य रहेको छ।घाइतेहरुलाई उपचारको लागि प्रदेश अस्पताल लमजुङ ल्याइएको छ ।
जिप ब्रेक फेल भएर भित्तामा ठाेकिन पुग्दा दुर्घटना भएको हुनसक्ने प्रहरीको प्रारम्भिक अनुमान छ ।
जिप चालक नियन्त्रणमा रहेको र घटनाबारे अनुसन्धान सुरु गरिएको जिल्ला प्रहरी कार्यालयका सूचना अधिकारी एवं प्रहरी निरीक्षक राज किशोर साहले जानकारी दिए ।
घाइतेको विवरण यसप्रकार छः
१ . दोर्दी–६ बस्ने मैती कुमारी तामाङ (४४), टाउको र बायाँ हातमा चोट, अवस्था मध्यम।
२. दोर्दी–६ बस्ने लाल बहादुर तामाङ (५८), ढाड र बायाँ हातमा चोट, अवस्था मध्यम।
३ . दोर्दी–६ बस्ने नबिन्द्र घले (२३), टाउको, ढाड र घाँटीमा चोट, अवस्था मध्यम।
४ . दोर्दी–६ बस्ने घिसे लामा (२१), बायाँ हात र खुट्टामा चोट, अवस्था सामान्य।
५ . दोर्दी–६ बस्ने हरीमाया तामाङ (३४), दायाँ हातमा चोट, अवस्था सामान्य।
६. दोर्दी–६ बस्ने खुसी माया घले (३०), दायाँ हातमा चोट, अवस्था सामान्य।
दोर्दी–६ बस्ने ठगम घले (४२), ढाडमा चोट, अवस्था सामान्य
