नेत्रविक्रम चन्द ‘बिप्लव’ नेतृत्वको ने.क.पा. रुकुम (पश्चिम)का जिल्ला सेक्रेटरी हिरामणि रावल (मन्जित) सहित चार नेता कार्यकर्तालाइ प्रहरीले आज गिरफ्तार गरेको छ । प्रहरीले जिल्लाको आठबीसकोट नगरपालिका–९, राडी बजारबाट जिल्लाको मुसीकोट नगरपालिका–६ का ३९ वर्षीय जिल्ला सेक्रेटरी रावलसहित पार्टीका जिल्ला सदस्य २८ वर्षीय घमण्ड महर र विद्यार्थी सङ्गठन अखिल क्रान्तिकारीका जिल्ला अध्यक्ष १९ वर्षीय प्रेमप्रशान्त बोहरा र पार्टीका कार्यकर्ता २० वर्षीय तुलबहादुर घर्तीलाई गिरफ्तार गरेको हो ।
उनीहरुलाई लुकीछिपी कार्यक्रम गरिरहेको अवस्थामा गिरफ्तार गरिएको प्रहरीको दाबी छ। राडीबजारको एक होटलको कोठामा छलफल गरिरहेको अवस्थामा उनीहरुलाई गिरफ्तार गरिएको जिल्ला प्रहरी प्रमुख प्रहरी नायब उपरीक्षक ठगबहादुर केसीले जानकारी दिए ।
यसैबीच, नेपाल कम्युनिस्ट पार्टी राप्ती ब्यूरोले पश्चिम रुकुमबाट गिरफ्तार गरिएका आफ्नो पार्टीका कार्यकर्ताहरुलाई अबिलम्ब रिहाइको माग गरेको छ । सो पार्टीका राप्ती ब्यूरो इन्चार्ज समरले बिहीबार प्रेस विज्ञप्ति जारी गर्दै बाढीपहिरो र कोरोना महामारीले प्रभाव जनताको लागि राहत संकलनका क्रममा हिडिरहेका आफ्नो पार्टीका हिरामणी रावल, अखिल (क्रान्तिकारी) का जिल्ला अध्यक्ष प्रेम प्रशान्त बोहोरा, घमण्ड महर र गोपीप्रसाद घर्तीलाई गिरफ्तार गरेको भन्दै विनाशर्त रिहाइको माग गरेका छन् ।
समरको विज्ञप्तिमा उनीहरुलाई पश्चिम रुकुमको रादीबाट गिरफ्तार गरी बन्दी बनाएको भन्दै अबिलम्ब रिहाइको माग गरिएको छ । कोरोना महामारी र बाढीपहिरोले प्रभावित जनताहरुको समस्या समाधान गर्नुभन्दा सरकार आफ्नो पार्टीका नेताकार्यकर्तालाई गिरफ्तार गर्नतिर लागेको भन्दै विज्ञप्तिमा भत्र्सना गरिएको छ ।
