गण्डकी प्रदेशमा आइतबार बिहानसम्म संक्रमितको संख्या एकसय १३ पुगेको छ । शनिबार एकैदिन ठूलो संख्यामा ३८ जना कोरोना संक्रमित थपिएसंगै गण्डकी प्रदेशमा संक्रमित संख्या एकसय १३ पुगेको हो।
प्रदेश स्वास्थ्य निर्देशनालयका अनुसार संक्रमितमा स्याङ्जाका मात्र १४ रहेका छन् । त्यस्तै गोरखा र बागलुङका १०/१०जना छन् । गोरखा जिल्लामै पहिलो पटक संक्रमित भेटिएका हुन् । यसअघि कञ्चनपुरमा कार्यररत गोरखाका एक व्यक्तिमा कोरोना संक्रमण पुष्टि भएको थियो ।
गोरखा गण्डकी गाउँपालिकाका ९ जना पुरुष र पालुङटार नगरपालिकाका एक किशोरमा संक्रमण देखिएको हो । पालुङटार नगरपालिकाका किशोर जिल्ला प्रहरी कार्यालय गोरखाको हिरासतमा रहेको प्रहरीले पुष्टि गरेको छ ।
गण्डकी गाउँपालिकाका बाँकी ९ जना संक्रमित मध्ये भारत बाट आएका ४-४ जना घ्याल्चोक स्थित भीमोदय विद्यालय,दर्बुङ स्थित रत्नेश्वर मावि र काभ्रेबाट आएका १ जना घ्याल्चोककै ज्ञानमार्ग माध्यमिक विद्यालयको क्वारेन्टीनमा रहेको गण्डकी गाउँपालिकाका अध्यक्ष होम बहादुर रानाले बताए ।
त्यस्तै पूर्वी नवलपरासीको हुप्सेकोट गाउँपालिकाका ४ जनामा संक्रमण देखिएको हो । संक्रमित सबै पुरुष रहेको र १७ देखि ५२ वर्षसम्मका उमेरका छन । उनीहरु सबै हालैमात्र भारतबाट फर्किएर क्वारेन्टाइनमा बस्दै आएका थिए । पोखरा स्वास्थ्य विज्ञान प्रतिष्ठानको प्रयोगशालामा शनिबार राति उनीहरुको पीसीआर परीक्षण गरिएको थियो ।
प्रदेश स्वास्थ्य निर्देशक तथा प्रदेश कोरोना नियन्त्रण तथा रोकथाम कार्यक्रमका प्रवक्ता डा.विनोदबिन्दु शर्माले संक्रमितलाई सम्बन्धित जिल्लाको अस्पतालको आइसोलेसनमा लैजाने तयारी भइरहेको बताए ।
