ब्यापक जनदबाबलाई अटेर गर्दै संसदबाट संचार अभिब्यक्तिमाथि अंकुश लगाउने सुचना प्रविधि विधेयक पारित गरेको भोलीपल्टै बिप्लव नेतृत्वको नेपाल कम्युनिष्ट पार्टीको मुखपत्र रातोखबर साप्ताहिकका प्रबन्धनिर्देशक भिमप्रसाद चापागाँईलाई प्रहरीले गिरफ्तार गरेको छ । उनलाई रातोखबर प्रकाशन गृह प्रा.लि.द्वारा प्रकाशन हुने रातोखबर साप्ताहिकको काम गरिरहेको बेला आइतबार अपरान्ह १ बजे काठमाडौँको नक्सालबाट प्रहरीले गिरफ्तार गरेको हो।
प्रबन्धनिर्देशक चापागाईलाई हाल काठमाडौँको सोह्रखुट्टे प्रहरी चौकीमा राखिएको छ र अभद्र ब्यहारको मुद्दा लगाईएको उनको पारिवारीक श्रोतले जनाएको छ ।
यसैबीच,रातोखबर प्रकाशन गृहका निर्देशक अनिल शर्मा विरहीले सोमबार प्रेस विज्ञप्ति जारी गर्दैआफ्नो प्रकाशन गृहका प्रबन्धनिर्देशक तथा पत्रकार चापागाईलाई बिनाकारण गिरफ्तार गरेको भन्दै तत्काल बिनाशर्त रिहाईको माग गरेका छन् । निर्देशक विरहीले विज्ञप्तिमार्फत सरकार निरङकुश बन्दै गैरहेको टिप्पणी गर्दै बैचारिक आस्थाकै आधारमा मिडिया सम्बद्ध ब्यक्तिलाई गिरफ्तार गरेको उल्लेख गरेका छन् ।
यस्तै रातोखबर साप्ताहिकका सम्पादक अशोकप्रसाद सुवेदीले पनि पत्रकार चापागाँईलाई गिरफ्तार गर्नु निन्दनीय भएको टिप्पणी गर्दै उक्त गिरफ्तारी संचारक्षेत्रमाथि गरिएको नियोजित आक्रमणको रुपमा व्याख्या गरेका छन् ।
