मियामी, अमेरिका २२ भदौ २०८३।
अमेरिकाको फ्लोरिडास्थित मियामी अन्तर्राष्ट्रिय विमानस्थलमा अवतरणका क्रममा अमेजन प्राइम एयरका लागि कार्गो उडान गरिरहेको बोइङ ७६७ विमान दुर्घटनामा पर्दा कम्तीमा पाँच जनाको मृत्यु भएको छ। दुर्घटनामा दुई पाइलटसहित अन्य पाँच जना घाइते भएका छन्।
स्थानीय अधिकारीहरूका अनुसार दुर्घटना आइतबार दिउँसो करिब २ बजे भएको हो। प्युर्टो रिकोको सान जुआनबाट मियामीका लागि उडेको २१ एयरको उडान नम्बर ७५९८ अवतरणका क्रममा रनवेबाट बाहिरिएको थियो। विमान रनवेको अन्तिम भाग पार गर्दै विमानस्थलबाहिरको सडकसम्म पुगेपछि सडकमा रहेका तथा पार्किङ गरिएका केही सवारीसाधनसँग ठोक्किएको बताइएको छ।
ठक्करपछि विमानको दायाँ भागमा आगलागी भएको थियो। घटनास्थलबाट बाक्लो कालो धुवाँको मुस्लो देखिएको थियो। दुर्घटनालगत्तै मियामी–डेड फायर रेस्क्युका ६० भन्दा बढी आकस्मिक उद्धार टोली तथा करिब २०० अग्निनियन्त्रक परिचालन गरिएको थियो।
उद्धार टोलीले विशेष फोमको प्रयोग गरी विमानमा लागेको आगो नियन्त्रणमा लिएको थियो। ककपिटमा रहेका पाइलट तथा सडकमा घाइते भएका व्यक्तिहरूको उद्धार गरी अस्पताल पुर्याइएको छ। घाइतेमध्ये तीन जनाको अवस्था गम्भीर रहेको बताइएको छ।
दुर्घटनापछि मियामी अन्तर्राष्ट्रिय विमानस्थलका रनवे तथा ट्याक्सीवेहरू अस्थायी रूपमा बन्द गरिएको थियो। अमेरिकाका यातायात सचिव सीन डफीले विमानस्थलमा ‘ग्राउन्ड स्टप’ लागू गरिएको जानकारी दिएका थिए। लेबर डे को लामो सप्ताहन्तका कारण यात्रुको चाप उच्च रहेका बेला विमानस्थल बन्द हुँदा सयौँ उडान प्रभावित भएका छन्।
दुर्घटनाको कारणबारे अनुसन्धान
अमेजनका प्रवक्ता केली नान्तेलले घटनाप्रति दुःख व्यक्त गर्दै पीडित तथा प्रभावित व्यक्तिहरूलाई सहयोग गर्नु कम्पनीको प्राथमिकता रहेको बताएका छन्। कम्पनीले स्थानीय अधिकारीहरूसँग समन्वय गरी घटनाबारे विवरण संकलन गरिरहेको जनाएको छ।
दुर्घटनाका बेला मियामी क्षेत्रमा भारी वर्षा र तीव्र हावा चलेको फ्लाइट ट्र्याकिङसम्बन्धी विवरणमा उल्लेख गरिएको छ। यद्यपि, अवतरणअघि विमानले कुनै आपत्कालीन अवस्था घोषणा नगरेको बताइएको छ।
