पोखरा, २५ असार २०८३।
अमेरिकी राष्ट्रपति डोनाल्ड ट्रम्पले इरानसँग भएको समझदारी समाप्त भएको घोषणा गरेको केही घण्टामै अमेरिकी सेनाले इरानमाथि अर्को चरणको हवाई आक्रमण सुरु गरेको छ।
अमेरिकी केन्द्रीय कमान्ड (सेन्टकम)का अनुसार बुधबार रातिदेखि इरानका विभिन्न सैन्य तथा रणनीतिक क्षेत्रमा लक्षित हवाई आक्रमण गरिएको हो। सेन्टकमले होर्मुज जलडमरूमध्यमा अन्तर्राष्ट्रिय जहाजमाथि भएको हालैको आक्रमणको जवाफस्वरूप कारबाही गरिएको जनाएको छ।
इरानी सरकारी सञ्चारमाध्यमहरूका अनुसार दक्षिणपूर्वी इरानका कोनारक, चाबहार र इरानसहर लगायतका क्षेत्रमा विस्फोटका आवाज सुनिएका छन्। इरानसहर विमानस्थल नजिक भएको आक्रमणमा एक अग्नि नियन्त्रकको मृत्यु भएको इरानी समाचार एजेन्सी आईआरएनएले जनाएको छ।
सिस्तान–बलुचिस्तान प्रान्तका स्थानीय अधिकारीहरूले स्थानीय समयअनुसार बुधबार राति करिब १२:३० बजे इरानसहर क्षेत्रमा लगातार चारवटा ठूला विस्फोट भएको जानकारी दिएका छन्। त्यस्तै, चाबहार क्षेत्रमा आक्रमणपछि बन्दरगाह क्षेत्रका गोदामबाट सवारीसाधन सुरक्षित स्थानमा सार्ने काम सुरु गरिएको छ। अधिकारीहरूका अनुसार मध्यरातसम्म करिब ३०० सवारीसाधन हटाइसकिएको छ भने बाँकी सवारीसाधन पनि सुरक्षित स्थानमा सार्ने कार्य जारी छ।
यसअघि मंगलबार पनि अमेरिकाले इरानका ८० भन्दा बढी सैन्य लक्ष्यमा हवाई आक्रमण गरेको थियो। अमेरिकी पक्षले ती कारबाही इरानद्वारा होर्मुज जलडमरूमध्यमा व्यावसायिक जहाजमाथि भएको आक्रमणको प्रतिकारका रूपमा गरिएको जनाएको छ।
नेटो शिखर सम्मेलनका क्रममा राष्ट्रपति ट्रम्पले इरानविरुद्ध थप सैन्य कारबाही हुन सक्ने संकेत दिएका थिए। उनले इरानसँगको पछिल्लो समझदारी अब लागू नरहेको बताउँदै आवश्यक परे थप कडा कदम चालिने चेतावनी दिएका छन्।
यता इरानले अमेरिकी आक्रमणलाई अन्तर्राष्ट्रिय कानुनविपरीत भएको आरोप लगाउँदै त्यसको जवाफ दिने चेतावनी दिएको छ। पछिल्ला घटनाक्रमसँगै मध्यपूर्वमा तनाव पुनः तीव्र बनेको छ।
