पोखरा, ८ असार २०८३। विराटनगरस्थित नेपाल आयल निगमको कोशी प्रादेशिक कार्यालयको पार्किङस्थलबाट चोरी भएको पेट्रोल बोकेको एक ट्यांकर सुनसरीस्थित एक सडकमा भेटिएको छ।
आइतबार रातीदेखि हराएको नवीन ढुवानी सेवाको पेट्रोलसहितिको को १ ख ६१९० नम्बरको ट्यांकर सुनसरीको भोक्राहा नरसिंह गाउँपालिका–८ अन्तर्गत हुलाकी राजमार्ग क्षेत्रमा सोमबार बिहान करिब ११ बजे बेवारिसे अवस्थामा भेटिएको हो।
निगमका कोशी प्रादेशिक कार्यालय प्रमुख पुष्कर कार्कीका अनुसार हाल ट्यांकरलाई सुनसरी प्रहरीले नियन्त्रणमा लिएर थप अनुसन्धान अघि बढाएको छ। ट्यांकरमा करिब २० हजार लिटर पेट्रोलियम पदार्थ लोड गरिएको थियो। प्रारम्भिक निरीक्षणका क्रममा ट्यांकरबाट करिब १ हजारदेखि १ हजार २ सय लिटरसम्म इन्धन गायब भएको आशंका गरिएको छ। यद्यपि, ट्यांकर फेला परेको स्थान भिरालो तथा कोल्टे भएकाले इन्धनको वास्तविक परिमाण कति कमी भएको छ भन्ने विषय मुचुल्का प्रक्रिया पूरा गरी डिपोमा विस्तृत नापजाँच गरेपछि मात्र पुष्टि हुने कर्णले बताए।
भारतको सिलीगुडीबाट तेल बोकेर आएको ट्यांकर आइतबार साँझ करिब ८ बजे निगमको पार्किङमा प्रवेश गरी लाइनमा राखिएको थियो।
मंगलबार जिल्ला प्रहरी कार्यालय मोरङ, निगमका अधिकारी तथा ढुवानी प्रतिनिधिको उपस्थितिमा मुचुल्का उठाएर ट्यांकरलाई डिपोमा ल्याउने तयारी गरिएको छ।
अनुसार ट्यांकर चोरी गरेर हुलाकी राजमार्गसम्म ल्याइएपछि चोरहरूले त्यहाँ छाडेर फरार भएको देखिएको जिल्ला प्रहरी कार्यालय सुनसरीका प्रहरी नायब उपरीक्षक चन्द्र खड्काले जानकारी दिए।
