काठमाडौं, २९ जेठ २०८३ ।
फिफा विश्वकप २०२६ को उद्घाटन खेलमा सहआयोजक मेक्सिकोले दक्षिण अफ्रिकामाथि २–० को जित निकाल्दै प्रतियोगितामा सुखद सुरुवात गरेको छ। तर ऐतिहासिक एज्टेका रंगशालामा सम्पन्न खेल गोलका कारण मात्र होइन, तीन खेलाडीले रातो कार्ड पाएको घटनाका कारण पनि चर्चामा रह्यो।
विश्व फुटबलको इतिहासमा तीन फरक संस्करणका विश्वकप खेल आयोजना गर्ने पहिलो रंगशालाको कीर्तिमान बनाएको एज्टेका रंगशालामा हजारौं दर्शकको उपस्थितिबीच मेक्सिकोले घरेलु समर्थकलाई खुसी दियो। मेक्सिकोको जितमा जुलियन क्विनोनेस र अनुभवी फरवार्ड राउल जिमेनेजले एक–एक गोल गरे।
खेलको सुरुवातदेखि नै आक्रामक देखिएको मेक्सिकोले नवौं मिनेटमै अग्रता लिएको थियो। दक्षिण अफ्रिकाका गोलरक्षक रोनवेन विलियम्सको पास डिफेन्डरले नियन्त्रण गर्न नसक्दा सिर्जना भएको अवसरलाई जुलियन क्विनोनेसले सदुपयोग गर्दै टोलीलाई सुरुआती अग्रता दिलाएका थिए। इरिक लिराको पासमा क्विनोनेसले गरेको प्रहारले जाली चुम्दा रंगशालामा उपस्थित समर्थक उत्साहित बनेका थिए।
पहिलो हाफमा नै अर्को गोल गर्ने अवसर पाए पनि ४२औं मिनेटमा क्विनोनेसको प्रहार गोलपोस्टमा लागेर फर्किएको थियो।
दोस्रो हाफमा खेल झन् तनावपूर्ण बनेको थियो। खेलको ४९औं मिनेटमा दक्षिण अफ्रिकाका सेफेलो सिथोलले विपक्षी खेलाडीमाथि फाउल गरेपछि सीधा रातो कार्ड पाएर मैदान छाड्नुपरेको थियो। त्यसपछि ८४औं मिनेटमा थेम्बा ज्वानेले पनि रातो कार्ड पाएपछि दक्षिण अफ्रिका नौ खेलाडीमा सीमित भएको थियो।
खेलको अन्त्यतिर मेक्सिकोले आफ्नो दबाब कायम राख्दै दोस्रो गोल थप्यो। यद्यपि अतिरिक्त समयमा घरेलु टोलीका डिफेन्डर सेजर मोन्टेसले पनि रातो कार्ड पाएपछि मेक्सिकोले खेल १० खेलाडीमा समाप्त गरेको थियो।
यससँगै उद्घाटन खेलमा दुवै टोलीका गरी तीन खेलाडीले रातो कार्ड पाएको दुर्लभ दृश्य देखियो। दक्षिण अफ्रिकाका दुई तथा मेक्सिकोका एक खेलाडी मैदानबाट बाहिरिँदा खेल निकै प्रतिस्पर्धात्मक र विवादास्पद बनेको थियो।
जितसँगै मेक्सिकोले विश्वकप अभियानमा महत्वपूर्ण तीन अंक जोडेको छ भने दक्षिण अफ्रिकाले हारबाट प्रतियोगिताको सुरुवात गरेको छ।
