पोखरा, २० जेठ २०८३।
चोरीका तथा भन्सार छली गरी ल्याइएका मोबाइल फोनको किनबेचमा संलग्न रहेको आरोपमा प्रहरीले चार जनालाई पक्राउ गरेको छ। प्रहरी वृत्त गौशालाको टोलीले ४२ थान मोबाइलसहित चार जनालाई नियन्त्रणमा लिएको हो।
पक्राउ पर्नेमा रौतहटको गौर नगरपालिका–६ का २० वर्षीय रवीन्द्र पासवान, काठमाडौं चाबहिल बस्ने २५ वर्षीय सुजन बस्नेत, धादिङको धुनिबेशी नगरपालिका–६ का ३३ वर्षीय जनक लामा तथा सप्तरीको धनगढी नगरपालिका–१ का ३२ वर्षीय प्रमोद शाह रहेका छन्।
प्रहरीका अनुसार पासवान र बस्नेत मोबाइल चोरीमा संलग्न थिए भने लामा चोरीका मोबाइल खरिद गर्ने मोबाइल पसल सञ्चालक हुन्। शाहले भन्सार छली गरी ल्याइएका मोबाइलको लक तोड्ने काम गर्दै आएको प्रारम्भिक अनुसन्धानबाट खुलेको छ।
प्रहरीले जेठ १७ गते बिहान चाबहिल क्षेत्रबाट पासवानलाई पक्राउ गरेको थियो। उनको साथबाट एक थान आईफोन र एक थान रेडमी मोबाइल बरामद भएको थियो। सोधपुछका क्रममा उनले ती मोबाइल बस्नेतबाट प्राप्त गरेको बताएका थिए।
त्यसपछि प्रहरीले सुकेधाराबाट बस्नेतलाई पक्राउ गरी उनको साथबाट इनफिनिक्स र ओप्पो ब्रान्डका मोबाइल बरामद गरेको थियो। अनुसन्धानका क्रममा उनीहरूले चोरीका मोबाइल जनक लामालाई बिक्री गर्दै आएको खुलेपछि प्रहरीले लामालाई पक्राउ गरेको हो।
लामाको पसलबाट चोरीका तथा भन्सार छली गरी भारतबाट ल्याइएका विभिन्न कम्पनीका ३५ थान मोबाइल बरामद गरिएको प्रहरीले जनाएको छ। सोही क्रममा मोबाइलको लक तोड्ने कार्यमा संलग्न प्रमोद शाहलाई पनि पक्राउ गरिएको थियो।
शाहले भन्सार छलीका मोबाइलहरूको लक तोड्ने गरेको र उनका साथबाट थप सात थान मोबाइल बरामद भएको प्रहरीले जनाएको छ। यससँगै कुल ४२ थान मोबाइल बरामद गरिएको छ।
प्रहरीले घटनाबारे थप अनुसन्धान जारी रहेको जनाएको छ।
