पोखरा , १२ बैशाख २०८३।
काठमाडौं उपत्यकामा एटीएम तोडफोड तथा लुटपाट जस्ता आपराधिक गतिविधिमा संलग्न एक युवकलाई प्रहरीले पक्राउ गरेको छ । पक्राउ पर्नेमा सिन्धुली जिल्लाको हरिहरपुरगढी गाउँपालिका–८, क्यानखोला घर भई हाल काठमाडौंमा बसोबास गर्दै आएका २१ वर्षीय सविन नेपाली रहेका छन् । उनलाई काठमाडौं उपत्यका अपराध अनुसन्धान कार्यालयको विशेष टोलीले सामाखुसी क्षेत्रबाट नियन्त्रणमा लिएको हो ।
प्रहरीका अनुसार नेपालीमाथि पछिल्ला दिनहरूमा घटित दुई पृथक आपराधिक घटनामा संलग्नता रहेको आरोप छ । गत ९ वैशाखमा काठमाडौं महानगरपालिका न्यूरोडस्थित रामघाट गल्लीमा एक व्यक्तिमाथि कुटपिट गरी नगद तथा अन्य सामग्री लुटपाट गरेको अभियोग उनीमाथि लागेको छ । त्यसको भोलिपल्ट, १० वैशाखमा गोंगबु चोक नजिकै रहेको ग्लोबल आईएमई बैंकको एटीएम मेसिनमा तोडफोड गरेको घटनासमेत उनैले गरेको प्रारम्भिक अनुसन्धानबाट खुलेको प्रहरीले जनाएको छ ।
अनुसन्धानका क्रममा नेपालीको आपराधिक पृष्ठभूमि पनि उजागर भएको छ । यसअघि उनी साइबर अपराधसम्बन्धी कसुरमा दोषी ठहर भई दुई महिना बाल सुधार गृहमा बसिसकेको अभिलेख फेला परेको छ । साथै, चोरीसम्बन्धी अर्को मुद्दामा गत वर्ष साउन २२ गते प्रहरी वृत्त जनसेवाले उनलाई पक्राउ गरी अनुसन्धान गरिरहेको अवस्थामा जेनजी आन्दोलनको मौकामा हिरासतबाट फरार भएको समेत खुलासा भएको छ । सो क्रममा ‘जेनजी आन्दोलन’ का कारण उत्पन्न अव्यवस्थाको फाइदा उठाउँदै उनी भाग्न सफल भएको प्रहरी स्रोतले जनाएको छ ।
प्रहरीले पछिल्लो समय राजधानीमा एटीएम तोडफोड, लुटपाट तथा सार्वजनिक सुरक्षामा चुनौती उत्पन्न गर्ने गतिविधिहरू बढ्दै गएको भन्दै त्यस्ता घटनामा संलग्न व्यक्तिहरूमाथि कडाइका साथ कारबाही गर्ने नीति अवलम्बन गरिएको जनाएको छ । पक्राउ परेका नेपालीमाथि सम्बन्धित कसुरहरूमा आवश्यक कानुनी प्रक्रिया अघि बढाइएको छ र थप अनुसन्धान जारी रहेको प्रहरीले जानकारी दिएको छ ।
यस घटनाले शहरी क्षेत्रमा बढ्दो आपराधिक प्रवृत्तिप्रति सुरक्षा निकायलाई अझ सतर्क बन्न आवश्यक रहेको संकेत गरेको छ। साथै, नागरिकहरूलाई पनि आफ्नो सुरक्षाप्रति सचेत रहन र शंकास्पद गतिविधिबारे तुरुन्त प्रहरीलाई जानकारी गराउन आग्रह गरिएको छ ।
