पोखरा, १० फागुन २०८१।
अध्ययनका लागि बेलायत पुगेका धनुषाका एक युवा करीब तीन सातादेखि बेपत्ता भएका छन्।
सन् २०२२ को सेप्टेम्बर १७ मा युनिभर्सिटी अफ क्रियटिभ आर्टस्मा पढ्न बेलायत पुगेका धनुषाको हंसपुर ६ का २३ वर्षीय कमल अधिकारी फेब्रुअरी २ देखि बेपत्ता भएका हुन्। आफ्नो छोराको खोजीका लागि माघ २३ मा नै नेपालस्थित परराष्ट्र मन्त्रालयमा अधिकारीका बाबु हरिनारायण मण्डलले निवेदन दिएका थिए ।
नेपाली दूतावासका उपनियोग प्रमुख विपिन दुवाडीले दिएको जानाकारी अनुसार, अधिकारीको आनीबानीका कारण वेष्ट लन्डनमा घरबेटीले निकालेपछि उनी इलफोर्ड सेभेन किंग्स्का सुरज पण्डितसँग सम्पर्कमा आएका थिए ।
पण्डितले नेपालीको बिचल्ली भयो बस्न दिनु पर्यो भनेर अर्को घरबेटीमा कुरा गरे। तर उनको हाउभाउ र अवस्था देखेर राख्न मानेनन् । अनि पण्डित लगायत नेपालीले फेब्रुअरी २ मा रेल चढ्न बाटो खर्च जुटाएर पठाएयता उनी सम्पर्कमा छैनन् ।
बेलायत आउने विद्यार्थीहरूमा अहिले थुप्रै खालका समस्या रहेको दूतावासले जनाएको छ । जुन सोचले बेलायत आउँछन् यहाँ आएपछि सोचेअनुरूप नहुँदा विक्षिप्त बन्ने गरेको प्रशस्त उदाहरणहरू छन् । विदेश जानुअघि निकै सोचविचार गरेर मात्र आउन दूतावासको आग्रह छ ।
