भारतको उत्तरप्रदेशमा पर्ने कानपुर जिल्लामा अज्ञात समूहले बिहीबार राति करिब एक बजे अन्धाधुन्द गोली चलाउँदा एक डिएसपी र तीन इन्सपेक्टरसहित आठ जना प्रहरीहरु मारिएका छन्। केही प्रहरीहरु घाइते छन् ।
लामो समयदेखि फरार रहेका अभियुक्त विकास दुवेलाई पक्राउ गर्न बिकरु गाउँ पुगेका बेला प्रहरी टोलीमाथि घरको छतबाट गोली हानिएको थियो । यो आक्रमणमा अभियुक्त दुवे र उनकै समूहको संलग्नता रहेको भारतीय प्रहरीको दाबी छ । दुवेको समूह प्रहरीहरुको हतियारसमेत लुटेर फरार भएको बताइएको छ । प्रहरीको प्रतिरक्षामा गोली चलाउँदा दुवेको समूहका तीन सदस्यसमेत मारिएको जानकारी प्रहरीले दिएको छ ।
