सहमति खोज्ने प्रयाससहित प्रधानमन्त्रीको सरकारी निवास बालुवाटारमा बसेको तीन दल र मधेसी मोर्चाबीचको बैठक विना निष्कर्ष टुंगिएको छ । बिहान ९ बजेबाट शुरु भएको बैठकले सहमतिको वातावरण बन्नुको साटो झनै दुरी बढेको प्रतिक्रिया मधेसी नेताहरुले दिएका छन् ।
बैठकपछि सञ्चारकर्मीसँग बोलदै मधेसी जनाधिकार फोरम नेपालका अध्यक्ष उपेन्द्र यादवले आफूहरुका माग पुरा गर्न नभइ अल्मल्यायनका लागि बोलाइएको भन्दै आक्रोश पोखे । ‘हामी यहाँ सहमति खोज्न आएका हौं । तर तीन दल अझै हामीलाई अल्मल्याउने योजनामा लागेको पाइयो’, अध्यक्ष यादवले भने, ‘सहमति होइन, विमति बढ्यो । सरकारले आन्दोलन रोक्न चाहेन, हामी आन्दोलनमै छौं ।’
सद्भावनाका सहअध्यक्ष लक्ष्मण लाल कर्णले जुन उत्साहसँग शीर्षसँगको बैठकमा सहभागी हुन आएको बैठकपछि निराश हुनुपरेको प्रतिक्रिया दिए । ‘सत्तारुढ दल नै मधेसका कुनै मागालई सम्बोधन गर्ने पक्षमा देखिएनन्’, उनले भने, ‘तीन दलले सहमति नचाहेपछि हिजोको परिस्थिति जहाँ थियो, अहिले पनि त्यहीँ छ ।’
तराई मधेस सद्भावना पार्टीका नेता रामनरेश यादवले कांग्रेस, एमाले र एमाओवादी नभइ प्रधानमन्त्री केपी ओली सहमतिको बाधक भएको प्रतिक्रिया दिए । ‘मधेस आन्दोलन टुंग्याउन कांग्रेस, एमाले र एमाओवादी होइन, प्रधानमन्त्री केपी ओली बाधक हुन्’, उनले भने, ‘आजको वार्ताले सहमतिको साटो बिमति बढायो ।
