काठमाडौं, २० असोज २०८३ ।
जिल्ला अदालत काठमाडौंले नागरिक बचाउ महाअभियानका संयोजक एबम मेडिकल व्यवसायी दुर्गा प्रसाईंलाई विद्युतीय कारोबारसम्बन्धी कसुरमा दुई लाख रुपैयाँ धरौटी लिएर तारेखमा छाड्न आदेश दिएको छ।
जिल्ला न्यायाधीश उमेशप्रसाद लुइँटेलको मंगलबारको इजलाशले प्रसाईंसँग दुइलाख रुपैयाँ धरौटी लिएर तारेखमा छाड्न आदेश दिएको हो। धरौटी रकम बुझाएपछि उनी हिरासतमुक्त हुनेछन्।
प्रसाईंविरुद्ध राष्ट्रिय स्वतन्त्र पार्टी (रास्वपा)की सांसद रचना खतिवडाले दिएको उजुरीका आधारमा नेपाल प्रहरीको साइबर ब्युरोले अनुसन्धान अघि बढाएको थियो। त्यसपछि उनीविरुद्ध विद्युतीय कारोबार ऐन, २०६३ अन्तर्गत मुद्दा दर्ता गरिएको थियो।
के आरोप थियो?
प्रसाईंले युट्युबमार्फत सांसद खतिवडाबारे आपत्तिजनक तथा अपमानजनक टिप्पणी गरेको आरोप छ। उपलब्ध विवरणअनुसार उनले खतिवडाले ‘छोराको शवसँग सांसद पद साटेको’ भन्ने आशयको अभिव्यक्ति दिएका थिए। यही अभिव्यक्तिलाई लिएर खतिवडाले प्रहरीमा उजुरी दिएकी थिइन्।
उजुरीपछि साइबर ब्युरोले अदालतबाट पक्राउ पुर्जी लिएर प्रसाईंलाई असार १२ गते पक्राउ गरेको थियो। त्यसपछि अनुसन्धान अघि बढाउँदै प्रहरीले उनीविरुद्ध विद्युतीय कारोबारसम्बन्धी कसुरमा मुद्दा दर्ता गरेको थियो।
बन्दीप्रत्यक्षीकरणको रिट पनि परेको थियो
प्रसाईंकी पत्नी उमा प्रसाईंले उनलाई गैरकानुनी रूपमा थुनामा राखिएको दाबी गर्दै सर्वोच्च अदालतमा बन्दीप्रत्यक्षीकरणको रिट दायर गरेकी थिइन्। उक्त रिटसम्बन्धी प्रक्रियामा सर्वोच्च अदालतले अनुसन्धान तथा म्याद थपसम्बन्धी सक्कल फाइलसमेत झिकाउन आदेश दिएको विवरण सार्वजनिक भएको छ।
अहिले भने जिल्ला अदालतबाट दुई लाख रुपैयाँ धरौटीमा छाड्ने आदेश आएपछि प्रसाईंको हिरासतसम्बन्धी तत्कालको अवस्था टुंगिएको छ। तर उनीविरुद्ध दायर विद्युतीय कारोबारसम्बन्धी मुद्दाको न्यायिक प्रक्रिया भने जारी रहनेछ।
प्रसाईं यसअघि पनि आफ्ना अभिव्यक्ति तथा विभिन्न विवादास्पद गतिविधिका कारण कानुनी विवादमा पर्दै आएका छन्।
