वासिङ्टन, ३ असोज २०८३।
इरानबीच लामो समयदेखि जारी सैन्य तथा कूटनीतिक तनावका बीच अमेरिकाले इरानी राष्ट्रपति मसूद पेजेशकियान र विदेशमन्त्री अब्बास अराघचीसहित उच्चस्तरीय प्रतिनिधिमण्डललाई अमेरिका प्रवेशका लागि अनुमति दिएको छ।
अमेरिकी विदेश मन्त्रालयले बिहीबार इरानको ‘कोर प्रतिनिधिमण्डल’ तथा संयुक्त राष्ट्रसंघको महासभा बैठकमा सहभागी हुन आवश्यक कर्मचारीका लागि भिसा स्वीकृत गरिएको जनाएको हो। अमेरिकी अधिकारीहरूका अनुसार स्वीकृत प्रतिनिधिमण्डलमा राष्ट्रपति पेजेशकियान र विदेशमन्त्री अराघची पनि रहेका छन्।
आगामी साता न्यूयोर्कमा हुने संयुक्त राष्ट्रसंघ महासभाको उच्चस्तरीय बैठकमा पेजेशकियानले सम्बोधन गर्ने कार्यक्रम रहेको छ। अमेरिकी निर्णय इरानसँगको लामो समयदेखिको सैन्य द्वन्द्व र तनावपूर्ण सम्बन्धका बीच आएको हो।
लामो समयदेखि सैन्य तनाव
अमेरिका र इरानबीच फेब्रुअरीमा सैन्य संघर्ष सुरु भएपछि दुई देशबीचको सम्बन्ध थप तनावपूर्ण बनेको छ। त्यसयता दुवै पक्षबीच प्रत्यक्ष सैन्य कारबाही तथा क्षेत्रीय तनाव बढ्दै आएको अन्तर्राष्ट्रिय सञ्चारमाध्यमहरूले जनाएका छन्।
यसैबीच होर्मुज जलडमरूमध्यको सञ्चालन र इरानको आणविक कार्यक्रमलगायत विषयमा दुई देशबीच मतभेद कायमै छन्। यी विषयमा दीर्घकालीन सहमतिको अवस्था अझै स्पष्ट भइसकेको छैन।
इरानी प्रतिनिधिमण्डललाई अमेरिकाले भिसा दिए पनि न्यूयोर्कमा उनीहरूको आवागमन तथा केही खरिदसम्बन्धी प्रतिबन्ध भने कायम रहने जनाइएको छ। यस वर्षको इरानी प्रतिनिधिमण्डल अघिल्लो वर्षको तुलनामा सानो हुने बताइएको छ।
कूटनीतिक संवादको सम्भावना
सैन्य तनाव जारी रहे पनि संयुक्त राष्ट्रसंघ महासभामा इरानी नेतृत्वको सहभागिताले अमेरिका–इरान सम्बन्धबारे कूटनीतिक संवादका लागि नयाँ अवसर सिर्जना गर्न सक्ने अपेक्षा गरिएको छ। यद्यपि भिसा स्वीकृत हुँदैमा दुई देशबीचको विवाद समाधान भएको वा वार्तामा ठोस सहमति बनेको अर्थ नलाग्ने अधिकारी तथा रिपोर्टहरूले उल्लेख गरेका छन्।
आगामी महासभामा इरानी नेतृत्वको उपस्थिति, दुई देशबीचको सैन्य तनाव, आणविक कार्यक्रम र होर्मुज जलडमरूमध्यको अवस्थाबारे अन्तर्राष्ट्रिय समुदायको ध्यान केन्द्रित हुने देखिएको छ। एजेन्सीहरुको सहयोगमा
