काठमाडौं , १९ भदौ २०८३।
त्रिशूली–३ ‘ए’ जलविद्युत आयोजनाको सुरुङभित्र फसेका व्यक्तिहरूको उद्धारमा महत्वपूर्ण प्रगति भएको छ। सुरुङभित्रबाट एकभन्दा बढी व्यक्तिको आवाज सुनिएको र उद्धार टोलीसँग दोहोरो संवादसमेत भएको पुष्टि भएको छ।
सांसद श्रीराम न्यौपानेले सामाजिक सञ्जालमार्फत सुरुङभित्रबाट एकभन्दा बढी व्यक्तिको आवाज सुनिएको जानकारी दिएका हुन्। उनका अनुसार उद्धारमा खटिएको टोलीले सुरुङभित्र रहेका व्यक्तिहरूलाई ‘नआत्तिनुहोस्, हामी उद्धार गर्दैछौँ’ भन्दै ढाडस दिँदा भित्रबाट ‘हुन्छ’ भन्ने प्रतिक्रिया आएको थियो।
सुरुङभित्रबाट आएको स्पष्ट प्रतिक्रियाले त्यहाँ फसेका व्यक्तिहरू जीवित र सचेत अवस्थामा रहेको संकेत गरेको छ। यस घटनाले उद्धारमा संलग्न टोली तथा आफन्तमा समेत थप आशा जगाएको छ।
न्यौपानेका अनुसार नेपाली सेना र सशस्त्र प्रहरीको टोलीले सुरुङको जटिल अवस्थालाई ध्यानमा राख्दै अत्यन्त सावधानीपूर्वक उद्धार अभियान अघि बढाइरहेको छ। उद्धारका लागि थप प्राविधिक सहयोग तथा आवश्यक उपकरणहरू घटनास्थलमा परिचालन गरिएको छ।
सुरुङभित्र फसेका व्यक्तिहरूसँग सम्पर्क स्थापित भएपछि उद्धार टोलीलाई थप उत्साह मिलेको छ। जोखिमपूर्ण अवस्थाका बाबजुद सुरक्षाकर्मी तथा प्राविधिक टोलीले उनीहरूलाई सुरक्षित रूपमा बाहिर निकाल्न निरन्तर प्रयास गरिरहेका छन्।
