काठमाडौँ, २३ साउन २०८३।
मधेश केन्द्रितसहित सात राजनीतिक दलले शनिबार काठमाडौंमा ‘अग्रगामी मोर्चा’ घोषणा गरेका छन्।
काठमाडौँको थापागाउँस्थित काठमाडौं ब्यांक्वेटमा आयोजित कार्यक्रममा सात दलले साझा राजनीतिक मोर्चा घोषणा गरेका हुन्। मोर्चामा जनता समाजवादी पार्टी नेपाल, नागरिक उन्मुक्ति पार्टी नेपाल, जनमत पार्टी, नेपाल संघीय समाजवादी पार्टी, आम जनता पार्टी, प्रजातान्त्रिक लोकतान्त्रिक पार्टी र बहुजन एकता पार्टी नेपाल सहभागी भएका छन्।
मोर्चा घोषणामा विभिन्न राजनीतिक दलका शीर्ष नेताहरू तथा प्रतिनिधिहरू सहभागी थिए। कार्यक्रममा महन्थ ठाकुर, उपेन्द्र यादव, डा. सीके राउत, जनार्दन शर्मा, रेशम चौधरी, प्रभु साह, सन्तोष परियार र रिजवान अन्सारीलगायत नेताहरूको सहभागिता रहेको छ।
सात दलबीचको यो सहकार्यलाई मधेश, संघीयता, समावेशिता तथा सामाजिक न्यायसँग जोडिएका मुद्दामा साझा राजनीतिक धारणा निर्माण गर्ने प्रयासका रूपमा हेरिएको छ।
मधेश केन्द्रित दलहरूबीच विगतमा पनि विभिन्न समयमा मोर्चाबन्दी र सहकार्य हुँदै आएको छ। पछिल्लो मोर्चाले भने विभिन्न राजनीतिक धार र क्षेत्रीय आधार भएका दललाई एउटै राजनीतिक मञ्चमा ल्याउने प्रयास गरेको देखिन्छ। यसअघि पनि मधेश केन्द्रित दलहरूले संविधान संशोधन, संघीयता र प्राप्त राजनीतिक उपलब्धिको संरक्षणका विषयमा साझा धारणा बनाउने प्रयास गर्दै आएका थिए।
मोर्चा गठनसँगै यसको संगठनात्मक संरचना, साझा राजनीतिक एजेन्डा, आगामी रणनीति तथा निर्वाचनमा सहकार्यको स्वरूपबारे थप चासो बढेको छ। यी विषयमा मोर्चाले आगामी दिनमा औपचारिक धारणा सार्वजनिक गर्ने अपेक्षा गरिएको छ।
सात दलको यो नयाँ राजनीतिक सहकार्यले आगामी राष्ट्रिय राजनीतिमा कस्तो प्रभाव पार्छ भन्ने विषय भने मोर्चाको साझा नीति, नेतृत्व संरचना र व्यवहारिक राजनीतिक कार्यदिशाले निर्धारण गर्नेछ।
