ललितपुर, १६ साउन २०८३।
अख्तियार दुरुपयोग अनुसन्धान आयोगको टोलीले ललितपुरको लखनखेलस्थित भूमि प्रशासन कार्यालयमा कार्यरत तीन जना नायब सुब्बालाई तीन लाख रुपैयाँ घुस रकमसहित पक्राउ गरेको छ।
अख्तियारका प्रवक्ता सुरेश न्यौपानेका अनुसार पक्राउ पर्नेमा भूमि प्रशासन कार्यालयका नायब सुब्बाहरू उत्तम कुँवर, विशाल सुन्दास र राजकुमार मगर रहेका छन्। उनीहरूलाई शुक्रबार ललितपुर महानगरपालिका–४ स्थित एक होटलबाट घुस रकमसहित नियन्त्रणमा लिइएको हो।
उनीहरूसँगै लेखापढी व्यवसायी शैलेन्द्र रानामगर र समिर कटवाललाई समेत अख्तियारको टोलीले नियन्त्रणमा लिएको प्रवक्ता न्यौपानेले जानकारी दिए।
अख्तियारका अनुसार जग्गाको बकसपत्र गराउने प्रयोजनका लागि सेवाग्राहीसँग घुस मागिएको भन्ने उजुरी परेपछि अख्तियार दुरुपयोग अनुसन्धान आयोग, टंगालबाट टोली परिचालन गरिएको थियो। अनुसन्धानका क्रममा उनीहरूले सेवाग्राहीबाट लिएको भनिएको ३ लाख रुपैयाँ घुस रकमसहित उनीहरूलाई पक्राउ गरिएको अख्तियारले जनाएको छ।
पक्राउ परेकाहरूको साथबाट घुस रकमबाहेक स्रोत नखुलेको थप २४ हजार आठ सय ९० रुपैयाँ समेत बरामद भएको अख्तियारले जनाएको छ।
अख्तियारले पक्राउ परेका पाँचै जनामाथि घुस लेनदेन तथा त्यससँग सम्बन्धित विषयमा अनुसन्धान अघि बढाएको छ। घटनामा उनीहरूको संलग्नता, रकमको स्रोत तथा घुस माग्नुको उद्देश्यबारे थप अनुसन्धान भइरहेको आयोगले जनाएको छ।
सरकारी कार्यालयबाट प्रदान गरिने सेवाका क्रममा कर्मचारी तथा बिचौलियामार्फत सेवाग्राहीसँग घुस मागिएको विषयमा प्राप्त उजुरीका आधारमा अख्तियारले निगरानी तथा अनुसन्धानलाई तीव्र बनाउँदै आएको छ। पछिल्लो पक्राउ पनि सेवाग्राहीलाई जग्गासम्बन्धी सेवा उपलब्ध गराउने क्रममा भएको भनिएको घुस लेनदेनको अनुसन्धानकै क्रममा भएको हो।
