पोखरा, २६ असार २०८३।
गएराती सेती नदीमाथिको झोलुङ्गे पुलबाट हाम फालेकी एक युवतीको दुई घण्टापछि सकुशल उद्धार भएको छ।
गएको बिहिबार राती करीब सवा आठ बजेको समयमा तनहुँको व्यास नगरपालिका–३ देउरालीनगर र ऋषिङ गाउँपालिका–१ झापुटार जोड्ने सेती नदीमाथिको झोलुङ्गे पुलबाट हाम फालेकी युवतीको दुई घण्टापछि सकुशल उद्धार गरिएको हो ।
सेतीमा हाम फालेपश्चात बीच भागमा अड्किएर बसेकी व्यास-४ बस्ने १७ वर्षीया युवतीलाई नेपाली सेनाको कालीभञ्जन गण (इ) र नेपाल प्रहरीको संयुक्त उद्धार टोलीले राती सवा १० बजेको समयमा उद्धार गरेको जिल्ला प्रहरी कार्यालय तनहुँले जानकारी दिएको छ।
प्राप्त विवरण अनुसार , शुरुमा ती युवतीको चप्पल पुलको माथि भेटिएको थियो । पुलबाट हाम फालेकी ती युवतीलाई केही क्षणमै एक जना प्रहरीले नदीमा गएर बचाएका थिए । त्यसपश्चात् नदीको बीच भागमा प्रहरीको सहयोगमा बसेकी उनको सेनाले बोटमार्फत् उद्धार गरेको हो ।
उद्धार गरिएकी ती युवतीको हाल दमौलूस्थित प्रदेश अस्पताल तनहुँमा उपचार भइरहेको प्रहरीले जनाएको छ।
