पोखरा , ६ असार २०८३।
पोखराको पृथ्वीचोकबाट ठुलो मात्रामा प्रतिबन्धित लागूऔषधसहित एक महिलालाई नियन्त्रणमा लिएको छ।
कास्की प्रहरीले ६ सय एम्पुल लागूऔषधसहित एक महिलालाई पक्राउ गरेको छ।
जिल्ला प्रहरी कार्यालय कास्की र लागूऔषध नियन्त्रण ब्युरो शाखा कार्यालय पोखराबाट खटिएको संयुक्त प्रहरी टोलीले पोखरा महानगरपालिका–९ पृथ्वीचोक क्षेत्रबाट करीब ६ सय एम्पुल लागूऔषधसहित रुपन्देहीको मायादेवी नगरपालिका–१२ निवासी २१ वर्षीया जिनी रावललाई पक्राउ गरेको हो।
प्रहरीका अनुसार रावलले झोलामा लुकाइछिपाइ ल्याएको अवस्थामा डाईजेपाम दुईसय एम्पुल, फेनारगन दुईसय एम्पुल र बुप्रेनोर्फिन दुईसय एम्पुल गरी कुल ६ सय एम्पुल लागूऔषध बरामद गरिएको छ। साथै उनको साथबाट दुई थान मोबाइल फोन समेत बरामद गरिएको प्रहरीले जनाएको छ।
लागूऔषध ओसारपसार भइरहेको भन्ने विशेष सूचनाका आधारमा शुक्रबार बिहान करिब ४ बजे गरिएको निगरानी तथा अनुसन्धानका क्रममा उनलाई नियन्त्रणमा लिइएको हो।
पक्राउ परेकी रावलविरुद्ध लागूऔषध सम्बन्धी कसूरमा कास्की जिल्ला अदालतबाट सात दिनको म्याद थप गरी थप अनुसन्धान भइरहेको प्रहरीले जनाएको छ।
