पोखरा, ३१ जेठ २०८३।
काभ्रेको नमोबुद्ध नगरपालिका वडा नम्बर २ को बुच्चाकोटमा शनिबार भएको बस दुर्घटनामा ज्यान गुमाउने सबै ८ जनाको पहिचान खुलेको छ ।
जिल्ला प्रहरी कार्यालय काभ्रेका प्रमुख प्रहरी उपरीक्षक रविन कार्कीका अनुसार उक्त दुर्घटनामा ज्यान गुमाउनेहरूमा सिन्धुलीको घ्यालेख गाउँपालिका–४ का २२ वर्षीया सूर्म लामा, नेपाली सेनामा अमल्दारका रूपमा कार्यरत दैलेखका ३० वर्षीय बमबहादर भण्डारी, रोशी गाउँपालिका वडा नम्बर ६ का ७३ वर्षीय मेघबहादुर तामाङ र रोशी–६ का ७५ वर्ष इन्द्रबहादुर तामाङ रहेका छन् ।
यस्तै रोशी–६ का ५५ वर्षीय राजु तामाङ, रोशी–७ की ३४ वर्षीया फूलमाया तामाङ, रोशी–७ की ६० वर्षीया माया लामा र रोशी–८ की ६० वर्षीया प्यारीमाया तामाङको पनि ज्यान गएको छ ।
बनेपाबाट रोशी गाउँपालिका वडा नम्बर ६ स्थित सुघुरे जाँदै गरेको बा ३ ख ८३९८ नम्बरको यात्रुवाहक बस हिजो बीपी राजमार्गअन्तर्गत नमोबद्धमा दुर्घटनामा परेको थियो । घाइतेहरूको धुलिखेल अस्पतालमा उपचार भइरहेको छ । दुर्घटनामा १७ जना घाइते भएका थिए ।
छानबिन समिति गठन
बुच्चाकोटमा शुक्रवार भएको बस दुर्घटनाको वास्तविक कारण पत्ता लगाउन छानबिन समिति गठन गरिएको छ। नेपाल प्रहरी प्रदेश कार्यालय काभ्रेका प्रहरी वरिष्ठ उपरीक्षक कमल थापाको संयोजकत्वमा ६ सदस्यीय छानबिन समिति शनिबार गठन गरिएको हो। समितिले घटनाको वास्तविक अवस्था, कारण तथा जिम्मेवार पक्ष पहिचान गरी सत्य तथ्य छानबिन गरी सात दिन भित्र प्रतिवेदन पेश गर्नु पर्ने बताइएको छ ।
