पोखरा,२८ फागुन २०८२।
सुर्खेतमा इनिसा विकको वलात्कारपछि भएको हत्यामा संलग्नमाथि कारबाहीको माग गर्दै मृतकका परिवारले जिल्ला प्रशासन तथा जिल्ला प्रहरी कार्यालय सुर्खेत अगाडि बुधबार प्रदर्शन गरेका छन् ।
घटना भएको पाँच दिन बितिसक्दा पनि प्रहरी प्रशासनले बेवास्ता गरेको र दोषीलाई उन्मुक्ति दिन खोजेको भन्दै मृतकका परिवार र आफन्तले खबरदारी गर्दै प्रदर्शन गरेका हुन् ।
प्राप्त विवरण अनुसार , गत शनिबार बिहान ६ बजे दुई घन्टा ट्यूसन पढ्न जान्छु भनेर घरबाट हिँडेकी वीरेन्द्रनगर-१ सुर्खेतकी इनिसा विक जंगलमा अचेत अवस्थामा भेटिएकी थिइन् । इनिसाको अवस्थाबारे करिब ९ बजे फोनमार्फत जानकारी पाएपछि आमा तीला विक घटना स्थल पुगेपछि उपचारका लागि इनिसालाई प्रदेश अस्पताल कालागाउँ लगिएको थियो । तर अस्पताल पुगेलगत्तै चिकित्सकले इनिशालाई मृत घोषणा गरेका थिए । त्यसपछि तीलाले छोरीको बलात्कारपछि हत्या भएको भन्दै चार जनाविरूद्ध प्रहरीमा किटानी जाहेरी दिएकी थिइन् ।
१६ वर्षिय इनिसाको बलात्कारपछि हत्याको आरोपमा अनुसन्धानका लागि चार जनालाई प्रहरीले पक्राउ गरिसकेको छ । परिवारले कर्तव्य ज्यान र जबर्जस्ती करणीसम्बन्धी उजुरी फागुन २५ गते दर्ता गरिसकेको छ । बलात्कारपछि गरिको हत्या अमानविय भएको भन्दै महिला अधिकारकर्मीले घटनाको निष्पक्ष छानबिन गर्न माग गरेका छन् ।
मृतकका आफन्तले भने घटना भएको पाँच दिन पुग्दासमेत घटनाको कुनै विवरण नआउनुले आशंका भएको भन्दै खबरदारी गरेको बताएका छन् । घटनामा संलग्न भएको आशंकामा चार जनालाई पक्राउ गरी अनुसान्धन भइरहेको जिल्ला प्रशासनले जनाएको छ ।
प्रदेश अस्पतालका चिकित्सकसहित भेरी अस्पतालका विशेषज्ञ चिकित्सकको टोलीले पोष्टमार्टम गरिएको र दोषीलाई काुननी कारबाही हुने जिल्ला प्रसासन कार्यालयले जनाएको छ । प्रहरीले अनुसन्धानका लागि इनिससँगै कक्षा ११ पढ्ने अनमोल गौलीसहित चार जना पक्राउ परेका छ । पक्राउ परेकाहरू चारै जना १८ वर्षमुनिका रहेको जिल्ला प्रहरी कार्यालय, सुर्खेतका प्रवक्ता डिएसपी मोहनजंग बुढथापाले जानकारी दिए ।
गौली र इनिसा दुवै साथी रहेको प्रहरीले जनाएको छ । बिहान दुवै जनासँगै आयुर्बेद अस्पतालबाट बीरेन्द्रनगर–४, शहीद पार्क नजिकको जनजागरण सामुदायिक वनतिर जाँदै गरेको स्थानीयले देखेको प्रहरीको प्रारम्भिक अनुसान्धनले जनाएको छ ।
यसैबीच कर्णाली प्रदेश अस्पताल, कालागाउँका तीन जना चिकित्सक सहित भेरी अस्पताल बाँकेका फोरेन्सिक विशेषज्ञ डा. अर्विन शाक्यले तयार पारेको पोस्टमार्टम रिपोर्ट बुधबार आएको छ । त्यस रिपोर्टमा जबरजस्ती करणी गर्दा मृतकको संवेदनशील अंग च्यातिएको र अत्यधिक रक्तस्राव हुँदा मृत्यु भएको देखिएको डा. शाक्यले जानकारी दिए । ‘पोस्टमार्टम रिर्पोटमा संवेदनशील अंग च्यातिएपछि अत्याधिक रक्तस्राव भएपछि मृत्यु भएको देखिन्छ,’ उनले भने । पाठेघरसम्म घाउको धब्बा देखिएको डा. शाक्यले बताए । ‘पीडितको संवेदनशील अंग पुरै च्यातिएर पाठेघरसम्म घाउको कालो धब्बा देखिएको छ’ डा. शाक्यले भने ।
देशभरबाट समर्थनको स्वर
यता उक्त घटनाको निष्पक्ष छानबिन गर्न र हत्यामा संलग्नलाई कडा कारबाहीको माग गर्दै देशैभर उनको पक्षमा चर्को आवाज उठेको छ । बुधबार दिनभर पीडित परिवार, आफन्त र अधिकारकर्मीहरूले प्रदेश राजधानी वीरेन्द्रनगरमा प्रदर्शन गरेका छन् ।
उनीहरूले जिल्ला प्रशासन कार्यालय सुर्खेतमा पुगेर प्रमुख जिल्ला अधिकारीको ध्यानाकर्षण समेत गराए । जिल्लाका अधिकारवादी संसंस्थाले यस घटनामा चासो देखाएका छन् । उनीहरूले गम्भीर अनुसन्धान र दोषीलाई कारबाहीको माग गर्दै जिल्ला प्रशासन, जिल्ला प्रहरी कार्यालयलगायत निकायमा ध्यानाकर्षण पत्र बुझाएका छन् ।
संघीय राजधानी काठमाडौंको माइतीघरमा पनि बुधवार दिउँसो दलित समुदायमाथि हिंसाका घटना बढ्दै गएको भन्दै अधिकारकर्मी तथा युवाहरूले खबरदारीसहित प्रदर्शन गरेका छन् । देशभर दलितमाथि हिंसा, बलात्कार र हत्या बढ्दै गएको भन्दै पीडितहरूको न्यायका लागि उनीहरूले खबरदारीसहित प्रदर्शन गरेका थिए ।
प्रदर्शनमा सहभागीहरूले ‘महिला हिंसा अन्त्य गर, बलात्कारीलाई कडा कारबाही गर, सरकार बदलियो, समाज बदलिएन, महिला शोषणविरुद्ध एक हौं,’ लगायतका प्लेकार्ड प्रदर्शन गरेका थिए । उनीहरूले निर्वाचनपछि दलित समुदायका व्यक्तिहरू संसदमा पुगेकाले अब दलितहरूको मुद्दालाई अघि बढाउनुपर्नेमा जोड समेत दिएका छन् ।
उक्त विषयलाई लिएर सामाजिक सञ्जालमा विभिन्न टिकाटिप्पणी भइरहेका छन् । राजनीतिक दल, अधिकारकर्मीदेखि कलाकारहरूले समेत चासोका साथ न्यायका लागि आवाज उठाइरहेका छन् । उक्त घटनालाई अत्यन्त दु:खद, अमानवीय र निन्दनीय भन्दै निष्पक्ष छानबिनको माग गरेका छन् ।
