पोखरा, १७ फागुन २०८२।
देशका बिभिन्न स्थानहरुबाट पोखरा आएका शेर्पा समुदायले आफ्नो महान चाड ल्होसार सामूहिक रुपमा मनाएका छन्।
पोखरामा रहेका शेर्पा समुदायले २१५३ मे फा ता लो ल्होसार पोखरा बुलौदीस्थित हिमचुली पार्टि प्यालेसमा सामूहिक रुपमा मनाए।
त्यस अवसरमा शेर्पा समुदायको मौलिक स्याब्रु नृत्य प्रस्तुत गरिएको थियो भने त्रिभुवन विश्वविद्यालयबाट स्नातक तह उत्तीर्ण गरेका लाक्पा शेर्पालाई सम्मान गरिएको थियो।
पोखरा शेर्पा समाज कास्कीले शेर्पा समुदायको महान पर्व २१५३औँ मे फा ता लो ग्याल्पो ल्होसारको अवसरमा आयोजित शुभकामना आदान–प्रदान तथा सांस्कृतिक कार्यक्रमका सहभागीहरुले आफ्नो भाषा, भेषभूषा, परम्परा र संस्कारको संरक्षण गर्न नयाँ पुस्तालाई सचेत र सक्रिय बनाउन आवश्यक रहेकोमा जोड दिए।
समाजका अध्यक्ष राजेश शेर्पाको अध्यक्षतामा सम्पन्न कार्यक्रममा प्रमुख अतिथि लोपेन गोम्पु शेर्पाले ग्याल्पो ल्होसारले शेर्पा समुदायको ऐतिहासिक पहिचान, धार्मिक आस्था र सांस्कृतिक मौलिकतालाई जोगाइराख्न महत्वपूर्ण भूमिका खेलेको बताए
विशेष अतिथिका रूपमा पूर्वाञ्चल सेवा समाजका अध्यक्ष बालकुमार लुईटेलले ल्होसार पर्वले आपसी सद्भाव, सहिष्णुता र एकताको सन्देश फैलाउने उल्लेख गर्नुभयो। उहाँले यस्ता सांस्कृतिक कार्यक्रमले सामाजिक सम्बन्धलाई अझ मजबुत बनाउने विश्वास व्यक्त गरे ।
कार्यक्रमका क्रममा विभिन्न वक्ताहरूले ग्याल्पो ल्होसारको ऐतिहासिक पृष्ठभूमि, यसको धार्मिक तथा सांस्कृतिक महत्वबारे चर्चा गर्दै समुदायबीच एकता, सहकार्य र आपसी सहयोगको भावना विकास गर्नुपर्नेमा जोड दिएका थिए। सहभागीहरूले एकअर्कालाई शुभकामना आदान–प्रदान गर्दै पर्वको उल्लास साझा गरेका थिए।
कार्यक्रमको सञ्चालन दावा छिरिङ शेर्पाले गरेका थिए। पोखरा शेर्पा समाजले आगामी दिनमा पनि समुदायको भाषा, संस्कृति र परम्पराको संरक्षण तथा प्रवर्द्धनका लागि यस्ता कार्यक्रमलाई निरन्तरता दिने जनाएको छ।
