भारतको हैदराबादका एक व्यापारीको घरमा लुटपाट गरेको आरोपमा भारतीय प्रहरीले पाँच नेपालीलाई पक्राउ गरेको छ।
पक्राउ परेका नेपालीहरुमा एक महिला पनि छन् र उनको नाम माया भएको भारतीय संचार माध्यमहरुले जनाएका छन्। उनीसंगै राजेश छविलाल सोनी, हेमप्रसाद, निर्मल साउद र विष्णु सुनवारलाई भारतीय प्रहरीले पक्राउ गरेको सार्वजनिक संचारमाध्यमको समाचारमा उल्लेख छ।
उनीहरुलाई भारतीय प्रहरीले उत्तर प्रदेशस्थित लखनउबाट पक्राउ गरेको हो । उनीहरु नेपाल फर्कदै गर्दा लखनउको रेलवे स्टेसनबाट पक्राउ गरिएको हो । भारतीय संचारमाध्यामका अनुसार पक्राउ परेका नेपालीहरुको साथबाट १७ लाख रुपैयाँ समेत बरामद भएको छ ।
पक्राउ परेका नेपालीहरुले अक्टोबर १९ मा हैदरावादस्थित एक व्यापारीको घरमा लुटपाट गरेर भागेको भारतीय प्रहरीले बताएको छ । पक्राउ परेका दुई जना सोही व्यापारीको घरमा काम गर्दैै आएका थिए । उनीहरुले १८ तोला सुनका गरगहना, ४० तोला चाँदी र १० लाख चोरी गरेको बताइएको छ । लखनउमा पक्राउ परेकाहरुलाई थप अनुुसन्धानको लागि हैदरावाद लगिएको हो ।
