ब्यारेकमा अचेत अवस्थामा भेटिएको भन्दै थप उपचारका लागि विराटनगरको विराट मेडिकल कलेज ल्याइएका नेपाली सेनाको हिले बाहिनीमा कार्यरत सैनिक हवल्दार परशुराम भट्टराईको सोही अस्पतालमा सोमबार मृत्यु भएको छ ।
उनलाई बाहिनीका सैनिक टोलीले जेठ ५ विराट मेडिकल कलेजमा ल्याएका थिए । सुनसरी रामधुनी नगरपालिका- ३ घर भएका भट्टराईको शरीरमा चोट भएकाले घटना शंकास्पद रहेको भन्दै आफन्तले शव बुझ्न अस्वीकार गरेका छन् र घटना छानबिनको माग गरेका छन् । उनीहरुले मृत्युका बारेमा भोलिपल्ट मात्रै जानकारी दिइएकोमा पनि शंका गरेका छन्।
आफन्तले शव बुझ्न नमानेपछि नेपाली सेनाले नै शव पोष्टमार्टमका लागि विपी कोइराला स्वास्थ्य विज्ञान प्रतिष्ठान धरान लगेको छ ।
घटना छानबिनको माग गर्दै मंगलबार आफन्त र छिमेकी सैनिक ब्यारेक रहेको स्थान धनकुटातर्फ गएका थिए । सुनसरीबाट धनकुटातर्फ गएका आफन्तलाई प्रहरीले भेडेटारबाटै फर्काइदिएको छ ।
