पाशुपत क्षेत्रको ग्वलमा रहेको जयवागेश्वरीको मन्दिर पुनःनिर्माणका क्रममा मन्दिरभित्र ३७७ वर्ष पुरानो ताम्रपत्र फेलापरेको छ ।
रञ्जना, भुजींमोल र प्रचलित लिपिमा नेपाल भाषामा लेखिएको ताम्रपत्र फेलापरेको हो ।
पत्रमा ग्वलका वैद्यथर भएकी एक महिलाले आफ्ना इष्ट देवता वागेश्वरीको नाममा सुन तथा चाँदीका गरगहना चढाएको उल्लेख रहेको स्थानीयले बताएका छन् ।
नेपाल संवत् ७६४ को ताम्रपत्रमा ‘गरगहना हराए वा तलमाथि भए पाँचजना भद्र–भलाद्मीहरुले विचार गर्नू’ भन्ने किसिमले उल्लेख गरिएको स्थानीय वासिन्दा जलदराज वैद्यले जानकारी दिए ।
यही पुस ११ गते मन्दिरको पछाडिको भित्तामा विभिन्न देवी–देउताका लिच्छविकालीन चित्रकला भेटिएको थियो ।
गएको भदौमा जयवागेश्वरी मन्दिरभित्र अर्को मन्दिर र तीनओटा गजुरहरुसमेत भेटिएको थियो । imagekhabar.com
