सवारी चेकजाँचको नाममा सवारी चालकसँग घुस मागेको उजुरी परेपछि जिल्ला ट्राफिक प्रहरी कार्यालय कास्कीमा कार्यरत दुई जना ट्राफिक प्रहरीलाई प्रहरीले पक्राउ गरेको छ । हाल वडा प्रहरी कार्यालय बैदाम पोखराको हिरासतमा रहेका ट्राफिक प्रहरीहरुमा हरिश्चन्द्र रिमाल र मोहनसिंह बिक रहेका छन् ।
बिजयापुरखोला पुल जिर्ण बनेपछि गाडी आवतजावत सामान्य बनाउन आइतबार बिहान १० देखि दिउँसो २ बजेसम्म ड्युटीमा खटाइएका ट्राफिक जवानहरु हरिश्चन्द्र रिमाल र मोहनसिंह बिकले सवारी चेकजाँचको नाममा सवारी चालकसँग घुस मागेको आरोप लागेको छ ।
उनीहरुले कोसँग कति रकम घुस मागे भन्ने बारेमा खुलाइएको छैन । तर जवानद्वयले कलेज पढ्ने विद्यार्थीसँग पैसा लिन खोजेको उजुरी परेको बताइएको छ ।
कास्की जिल्ला ट्राफिक प्रहरी प्रमुख मुरारी मिश्रले घुस मागेको आरोप लागेका ट्राफिक प्रहरी जवानद्वयसंग बयान लिन बाँकी रहेको जानकारी दिंदै उनीहरुले घुस मागेको प्रमाणित भएमा नियमानुसार कारबाही हुने स्पस्ट पारे ।
