मलेसियामा ६० वर्षे बीएन गठबन्धनको बिरासतको अन्त्य गर्दै पूर्वप्रधानमन्त्री महाथिर मोहम्मद नेतृत्वको विपक्षी गठबन्धनले आम निर्वाचनमा ऐतिहासिक जीत हासिल गरेको छ ।
सरकार गठनका लागि आवश्यक १ सय १२ सिटको थ्रेसहोल्ड कटाएर ९२ वर्षिय महाथिरले १ सय १५ सिट सुनिश्चित गर्नुभएको बीबीसीले उल्लेख गरेको छ। रजाक नेतृत्वको बारिसियन नेशनल बीएन गठबन्धन ७९ मतमा सिमित भएको छ । २ सय २२ जनप्रतिनिधि चयन गर्न भएको निर्वाचनमा प्रधानमन्त्री नाजिव रजाक र महाथिरबीच कडा प्रतिस्पर्धा भएको थियो ।
१४ औँ आमनिर्वाचनमा १ करोड भन्दा बढी मतदाताले मतदान गरेका थिए । बीएन गठबन्धनको लामो समयको विरासत अन्त्य गर्दै विजयी महाथिरले आफूले कुनै बदलाको भावना नराखी विधिको शासनलाई अघि बढाउन सबैसँग सहकार्य गर्ने प्रतिक्रिया दिनुभएको छ । यसअघि सन् २०१३ मा भएको निर्वाचनमा प्रधानमन्त्री रजाकको पार्टी नेतृत्वको गठबन्धनले अप्रत्यासित जित हासिल गरेको थियो ।
