कुनै समय एउटै पार्टीमा सँगै नेतृत्व गरेर रहेका नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ प्रधानमन्त्री भइ पदभार ग्रहण नगर्दै मोहन वैद्य नेतृत्वको नेकपा क्रान्तिकारी माओवादीले आन्दोलनको कार्यक्रम घोषणा गरेको छ । राजधानीमा तीन दिन भएको केन्द्रीय समितिको बैठकले राष्ट्रिय स्वाधिनताका विषयमा आन्दोलन गर्ने निर्णय गरेको हो ।
यस्तै, सुकुम्बासी समस्या, भ्रष्टाचार, कमिशनखोरी, महङ्गी, कालाबजारीको विरोध र भूकम्पपीडितहरूका लागि नवनिर्माणको व्यवस्था लगायतका विषयलाई लिएर पनि वैद्य माओवादीले आन्दोलन चर्काउने भएको छ ।
घोषित आन्दोलनको कार्यक्रम अनुसार राष्ट्रिय स्वाधिनताका विषयमा भदौ २४ गते देशब्यापी विरोध प्रदर्शन गर्ने रहेको क्रान्तिकारी माओवादीका अध्यक्ष मोहन वैद्यद्वारा विहीबार जारी विज्ञप्तिमा उल्लेख छ । राष्ट्रिय स्वाधीनता र अपर कर्णाली लगायत जलविद्युत् परियोजनाको बारेमा संघर्ष चर्काउने वैद्य माओवादीले निर्णय गरेको छ ।
सुकुम्बासी समस्याकाबारेमा आगमी भाद्र १५ गते देशका विभिन्न जिल्लाहरूमा विरोध प्रदर्शन गर्ने तथा संयुक्त मोर्चा तथा विभिन्न जवस मोर्चाहरूमार्फत भ्रष्टाचार, कमिशनखोरी, महङ्गी, कालाबजारीको विरोध र भूकम्पपीडितहरूका लागि नवनिर्माणको व्यवस्था लगायतका विषयलाई लिएर सङ्घर्षको कार्यक्रम गर्ने निर्णय गरेको जारी विज्ञप्तिमा उल्लेख छ ।
