पोखरा, १५ भदौ २०८३ । पोखराको गैरापाटनस्थित लेकसिटी कलेज एण्ड रिसर्च सेन्टरमा सामाजिक कार्य (बिएएसडब्लु) अध्ययनरत विद्यार्थीले भोटेकोशी बाढीपीडितका लागि राहत सामग्री संकलन गरी पोखरा महानगरपालिकालाई हस्तान्तरण गरेका छन् ।
विद्यार्थीले सोमबार पोखरा प्रदर्शनी केन्द्रस्थित महानगरपालिकाको राहत संकलन केन्द्रमा खाद्यान्न, लत्ताकपडा, स्वास्थ्य तथा सरसफाइ सामग्री बुझाएका हुन् ।
विद्यार्थीले राहत सामग्रीमा खाद्यान्न र दैनिक उपभोग्य वस्तुलाई प्राथमिकता दिएका छन् । संकलित सामग्रीमा १० केजीका दरले पांच बोरा र थप दुई साना बोरामा ५० प्याकेट सोयाबिन छ । त्यसैगरी दुई कार्टुन बिस्कुट, २० प्याकेट दालमोट, तीन बोरा चिउरा र दुई बोरा भुजा पनि राहतमा समावेश छ । स्वास्थ्य र व्यक्तिगत सरसफाइलाई ध्यान दिँदै उनीहरुले एकसय २० थान मञ्जन, एकसय २० थान ब्रस र एकसय २० थान नै नुहाउने साबुन संकलन गरेर बुझाएको विद्यार्थी सफल सुवेदीले बताए ।
बाढी प्रभावित क्षेत्रमा हुनसक्ने स्वास्थ्य जोखिम र महिलाको आवश्यकतालाई मध्यनजर गर्दै ६० प्याकेट लामखुट्टे धपाउने धूप र एकसय थान सेनेटरी प्याड पनि प्रदान गरिएको छ । विद्यार्थीले लत्ताकपडातर्फ ११ थान नयाँ ट्राउजर, २१ थान नयाँ ज्याकेट र बालबालिकाका लागि १२ थान नयाँ टिसर्ट उपलब्ध गराएका छन् । घरायसी प्रयोजनका लागि ६ थान बाल्टिन र ६ थान मग पनि राहत सामग्रीको सूचीमा समेटिएको छ ।
गत १० भदौमा भोटेकोशीमा आएको बाढीबाट प्रभावित नागरिकको सहयोगका लागि विद्यार्थीले अभियान सञ्चालन गरेका थिए ।
विद्यार्थी इविक कर्माचार्यले विपद्का बेला सामाजिक उत्तरदायित्व महसुस गर्दै बाढीपीडितलाई केही राहत पुगोस् भन्ने उद्देश्यले अभियान चलाइएको बताए । विद्यार्थी सफल सुवेदीका अनुसार स्वास्थ्य, सरसफाइ र दैनिक उपभोग्य सामग्रीलाई प्राथमिकता दिइएको हो ।
पोखरा महानगरपालिकाले संकलित सामग्री बाढी प्रभावित क्षेत्रमा पठाउने तयारी गरेको जनाएको छ । लेकसिटी कलेज त्रिभुवन विश्वविद्यालयबाट सम्बन्धन प्राप्त सामाजिक कार्य विषयमा स्नातक तह पढाउने पोखराको एकमात्र कलेज हो ।
