पोखरा , ३१ साउन २०८३।
ठुलो मात्रामा ट्यापेन्टाडोलसहित पोखराबाट छ जना लागू औषध कारोबारी पक्राउ परेका छन्।
पोखरा महानगरपालिका–१, सिम्पानीबाट गएको शुक्रबार साँझ करीब सात बजेको समयमा ठुलो मात्रामा ट्यापेन्टाडोलसहित छ जना लागू औषध कारोबारी पक्राउ परेका हुन्।
प्रहरीका अनुसार , पक्राउ पर्नेमा धादिङको गंगाजमुना गाउँपालिका–१ घर भई हाल पोखरा महानगरपालिका–१ कस्केरी बस्ने २१ वर्षीय लुकाश तामाङ, सोही गाउँपालिका–१ घर भई पोखरा–१९ लामाचौर बस्ने २२ वर्षीय सुवास तामाङ र पर्वतको मोदी गाउँपालिका–८ चित्रे घर भई पोखरा–१६ बाटुलेचौर मैदान बस्ने २१ वर्षीय स्वस्तम गुरुङ रहेका छन्।
त्यस्तै, पोखरा महानगरपालिका–१ सिम्पानीका १९ वर्षीय विकास तामाङ, पोखरा–१९ लामाचौरका २५ वर्षीय सन्दिप गुरुङ र कास्कीको माछापुच्छ्रे गाउँपालिका–४ घाचोक घर भई हाल पोखरा–२५ याम्दी बस्ने २० वर्षीय सुमित पुन मगरलाई पनि पक्राउ गरिएको प्रहरीले जानकारी दिएको छ। उनीहरूको साथबाट ८ सय चक्की ट्यापेन्टाडोल, नगद ८ हजार रुपैयाँ र चार थान मोबाइल बरामद गरेको जनाएको छ।
पक्राउ परेका सबैविरुद्ध लागूऔषधसम्बन्धी कसुरमा कास्की जिल्ला अदालतबाट सात दिनको म्याद थप गरी थप अनुसन्धान अघि बढाइएको जिल्ला प्रहरी कार्यालय कास्कीले जनाएको छ।
