काठमाण्डौ, १३ साउन २०८३।
बाँकेमा एक जना सशस्त्र प्रहरी हवल्दार ब्यारेकभित्रै मृत भेटिएका छन्।
बाँकेको नरैनापुर गाउँपालिकास्थित सशस्त्र प्रहरी बलको सीमा सुरक्षा गुल्ममा कार्यरत सशस्त्र प्रहरी हवल्दार कैलालीको गौरीगङ्गा नगरपालिका–५, चौमाला निवासी ३८ वर्षीय घनश्याम ढकाल ब्यारेकभित्र मृत अवस्थामा भेटिएका हुन्।
प्रहरीका अनुसार बुधबार बिहान नियमित सरसफाइका लागि अन्य सुरक्षाकर्मीहरू बाहिर निस्कँदा ढकाल भने कोठाबाट बाहिर नआएपछि सहकर्मीहरूले उनको कोठामा पुगेका थिए। त्यसक्रममा उनी आफू बस्ने कोठाको पंखामा झुन्डिएको अवस्थामा मृत फेला परेका थिए।
घटनाबारे जानकारी प्राप्त हुनासाथ इलाका प्रहरी कार्यालय तथा सम्बन्धित सुरक्षा निकायका अधिकारी घटनास्थल पुगेका थिए। घटनास्थलको मुचुल्का, प्रमाण सङ्कलन तथा अन्य कानुनी प्रक्रिया पूरा गरी घटनाबारे विस्तृत अनुसन्धान अघि बढाइएको प्रहरीले जनाएको छ।
प्रारम्भिक रूपमा मृत्युको कारण खुल्न नसकेको र पोस्टमार्टम प्रतिवेदन तथा अनुसन्धानबाट वास्तविक कारण स्पष्ट हुने प्रहरीको भनाइ छ। शवलाई आवश्यक कानुनी प्रक्रिया पूरा गरी पोस्टमार्टमका लागि अस्पताल पठाउने तयारी गरिएको छ।
घटनाले सशस्त्र प्रहरी संगठनभित्र शोकको वातावरण सिर्जना गरेको छ। प्रहरीले मृत्युको कारणबारे कुनै निष्कर्षमा नपुग्न आग्रह गर्दै सबै पक्षबाट अनुसन्धान भइरहेको जनाएको छ।
