पोखरा, ८ साउन २०८३ ।
केन्द्रमा सत्ता समीकरण फेरिएसँगै प्रदेश सरकारहरूको भागबण्डाबारे दलहरूबीच छलफल तीव्र बनेको छ। यसै क्रममा गण्डकी प्रदेश सरकारको नेतृत्व कसले गर्ने भन्ने विषय पनि चासोको केन्द्रमा परेको छ।
सत्तारुढ दलहरूबीच प्रदेश सरकार बाँडफाँटको प्रारम्भिक छलफलमा नेकपाले गण्डकी प्रदेशमा मुख्यमन्त्रीको दाबी प्रस्तुत गरेको छ। नेकपाका नेताहरूले आफ्नो दलको जनमत र प्रदेशसभामा रहेको सिट संख्याका आधारमा गण्डकीसहित केही प्रदेशको नेतृत्व दाबी गरेका छन्।
हालसम्म नेकपा र एमालेबीच प्रदेश सरकारको भागबण्डा टुंगो लागिसकेको छैन। एमालेले कोशी, लुम्बिनी, गण्डकी र कर्णाली प्रदेशमा दाबी गरेको बताइएको छ। तीमध्ये कोशी, लुम्बिनी र कर्णालीमा एमाले नेतृत्वको सरकार रहेको छ।
यता नेकपाले सुदूरपश्चिम, कर्णाली र बागमतीसँगै गण्डकी प्रदेशमा पनि दाबी गरेको छ। एमालेले कर्णाली प्रदेशको नेतृत्व कायम राख्ने अडान लिएमा गण्डकी प्रदेश नेकपाको भागमा पर्न सक्ने सम्भावना बढेको नेताहरूको भनाइ छ।
एमालेका एक पदाधिकारीका अनुसार कर्णाली प्रदेश एमालेले नै लिने विषयमा पार्टीभित्र छलफल भइरहेको छ। उनका अनुसार कोशी प्रदेश पनि नछोड्ने पक्षमा एमालेका नेताहरू देखिएका छन्। यद्यपि, सुदूरपश्चिम प्रदेश नेकपालाई दिने विषयमा सहमति नजिक पुगेको दाबी गरिएको छ।
नेकपाका नेताहरूले भने प्रदेशसभामा आफ्नो दलको प्रभाव र सिट संख्याका आधारमा गण्डकीसहित तीन प्रदेशको नेतृत्व पाउनुपर्ने तर्क गरेका छन्।
“दाबीको हिसाबले कर्णाली, सुदूरपश्चिम र बागमतीमा हाम्रो जनमत अन्य दलभन्दा बलियो छ। त्यसैले त्यहाँ नेतृत्वको दाबी स्वाभाविक हो,” नेकपाका एक नेताले भने, “गण्डकीलगायत अन्य प्रदेशमा पनि छलफल हुन सक्छ।”
गण्डकी प्रदेशमा नेकपाको दाबी बढ्नुको मुख्य कारण प्रदेशसभाको शक्ति सन्तुलन र सत्ता समीकरण रहेको नेताहरू बताउँछन्। यदि एमालेले कर्णालीलाई प्राथमिकता दिएर गण्डकीमा सहमति जनाएमा गण्डकीमा नयाँ नेतृत्व आउने बाटो खुल्नेछ।
तर, मधेश प्रदेशमा भने कांग्रेस नेतृत्वको सरकारमा एमाले र नेकपा सहभागी रहेकाले त्यहाँको व्यवस्थापनबारे अझै स्पष्ट निर्णय भइसकेको छैन।
दलहरूले प्रदेश सरकारको अन्तिम भागबण्डाका लागि कार्यदल गठन गर्ने तयारी गरेका छन्। उक्त कार्यदलले प्रदेशगत अवस्था, सिट संख्या, राजनीतिक सहमति र शक्ति सन्तुलनका आधारमा मापदण्ड तयार गर्ने बताइएको छ।
एमाले उपमहासचिव भट्टले भने कुन प्रदेश सरकारको नेतृत्व कुन दलले गर्ने भन्ने विषय अझै अन्तिम टुंगोमा नपुगेको बताएका छन्।
गण्डकीमा नयाँ सत्ता समीकरण बन्ने वा वर्तमान नेतृत्वले निरन्तरता पाउने भन्ने विषय अब एमाले–नेकपाबीच हुने अन्तिम सहमतिमा निर्भर रहने देखिएको छ।
