पोखरा , ६ साउन २०८३।
नेकपा (एमाले) का अध्यक्ष केपी शर्मा ओली र नेपाल कम्युनिस्ट पार्टी (नेकपा) का संयोजक पुष्पकमल दाहाल ‘प्रचण्ड’बीच ललितपुरमा तीन घण्टाभन्दा बढी समय सघन राजनीतिक छलफल भएको छ।
दुई नेताबीच प्रदेश सरकार गठन, आगामी निर्वाचनमा सम्भावित तालमेल तथा वाम शक्तिबीचको सम्भावित एकताबारे विस्तृत कुराकानी भएको स्रोतले जनाएको छ। प्रदेशमा नेपाली कांग्रेस र एमालेबीचको सत्ता सहकार्य अन्त्य भएसँगै ओली–प्रचण्ड संवादलाई राजनीतिक रूपमा अर्थपूर्ण रूपमा हेरिएको छ।
भेटपछि जनकपुर पुगेका संयोजक प्रचण्डले एमालेसँग सहकार्यको प्रक्रिया औपचारिक रूपमा अघि बढिसकेको बताए। उनले प्रदेश सरकारमा साझेदारीका विषयमा नेपाली कांग्रेससँग पनि छलफल जारी रहेकाले अन्तिम समझदारी भने हुन बाँकी रहेको स्पष्ट पारे।
उता, एमाले नेता महेश बस्नेतले सामाजिक सञ्जालमार्फत एमाले–नेकपा सहकार्यलाई मुलुकको हित र राजनीतिक स्थायित्वका लागि सकारात्मक कदमको रूपमा व्याख्या गरेका छन्।
स्रोतका अनुसार प्रचण्ड जनकपुरबाट काठमाडौं फर्किएपछि सहकार्य सम्बन्धी लिखित समझदारीको प्रक्रिया पनि अघि बढ्न सक्ने सम्भावना रहेको छ।
