पोखरा, २४ बैशाख २०८३ .
संवैधानिक परिषद्को बैठक आजका लागि बोलाइएसँगै सर्वोच्च अदालतको प्रधानन्यायाधीश को बन्छ भन्ने चर्चा शुरु भएको छ ।
प्रधानमन्त्रीको सचिवालयले आजको संबैधानिक परिषदको बैठकमा प्रधानन्यायाधीश सिफारिसको कार्यसूची रहेको जानकारी दिएको छ ।
प्रधानमन्त्री बालेन्द्र शाहले प्रधानन्यायाधीशको सिफारिस गर्न आज अपरान्ह ५ बजे संवैधानिक परिषदको बैठक बोलाएका छन् ।
यसअघि नै न्याय परिषद् बैठकले वरिष्ठ न्यायाधीश सपना प्रधान मल्लसहित कुमार रेग्मी, हरिप्रसाद फुयाल, डा.मनोजकुमार शर्मा, डा.नहकुल सुवेदी र तिल प्रसाद श्रेष्ठको नाम प्रधानन्यायाधीशका लागि सिफारिस गरिसकेको छ ।
संवैधानिक परिषदको बैठक बस्न नसक्दा उक्त प्रक्रिया रोकिएको थियो । परिषद्ले योग्यता,अनुभव र वरिष्ठताको आधारमा उनीहरूको नाम प्रस्ताव गरेको जनाएको छ ।
संवैधानिक परिषदले सिफारिस गरेका मध्येबाट एकजनालाई प्रधानन्यायाधीशका लागि चयन गर्ने संवैधानिक व्यवस्था छ । परिषदको निर्णयपछि उक्त नाम संसदीय सुनुवाइ प्रक्रियामा जान्छ र समितिबाट अनुमोदन भएपछि राष्ट्रपतिबाट प्रधानन्यायाधीशको नियुक्ति हुने कानुनी व्यवस्था रहेको छ ।
संविधानको धारा १२९ को उपधारा ३ मा सर्वोच्च अदालतको न्यायाधीश पदमा कम्तीमा तीन वर्ष काम गरेको व्यक्ति प्रधानन्यायाधीशको पदमा योग्य हुने उल्लेख छ । न्याय परिषद् बैठकले तीन वर्ष काम गरेको योग्यताको आधारमा छ जना न्यायाधीशको नाम सिफारिस गरेको हो । तर, प्रधानमन्त्री शाहले कसलाई प्रधानन्यायाधीश बनाउन चाहन्छन् भन्ने विषय अहिलेसम्म स्पष्ट भएको छैन । प्रधानमन्त्री बालेनले आफू अनुकूलको नियुक्ति सहज बनाउन संवैधानिक परिषद्सम्बन्धी अध्यादेश जारी गरेर यसअघिको व्यवस्था संशोधन गरेका छन् ।
