पोखरा, १४ माघ २०८२।
बारामा अज्ञात व्यक्तिद्वारा धारिलो हतियार प्रहार गरी हत्या गरिएका आमाछोराको पहिचान खुलेको छ।
बारा जिल्ला को परवानीपुर गाउँपालिका–१ रहरियाडीमा एकै परिवारका ४६ वर्षीया आमा सुमित्रा देवी मण्डल र उनका २४ वर्षीय छोरा रामेश्वर मण्डलको निर्मम हत्या गरिएको जिल्ला प्रहरी कार्यालय बाराका प्रवक्ता प्रहरी नायब उपरीक्षक विजयराज पण्डितले जानकारी दिएका छन्।
डिएसपी पण्डितका अनुसार आज बिहान करिब ३ बजेतिर अज्ञात व्यक्तिले धारिलो हतियार प्रहार गर्दा आमा र छोराको घटनास्थलमै मृत्यु भएको हो।
उक्त घटनामा परिवारकै ५० वर्षीय श्रीमान् जगरूप मण्डल र २२ वर्षीया छोरी रिना कुमारी गम्भीर घाइते भएका छन्। घाइते दुवै जनाको परवानीपुरस्थित एलएस न्युरो अस्पतालमा उपचार भइरहेको प्रहरीले जनाएको छ।
हत्या कसले र किन गरेको भन्ने विषयमा हालसम्म खुल्न नसकेको र घटनाको विषयमा थप अनुसन्धान भइरहेको डिएसपी पण्डितले जानकारी दिएका छन्।
