पोखरा , १७ पुष २०८२।
पोखरामा जारी सडक महोत्सवमा रक्सी खाएर झैँ-झगडा गर्ने १४ जना पक्राउ परेका छन्।
पोखरा महानगरपालिका वडा नम्बर ६ लेकसाइडमा जारी ‘२७ औं सडक महोत्सव’ मा मादक पदार्थ रक्सी सेवन गरी होहल्ला र झगडा गरेपछि उनीहरूलाई प्रहरीले पक्राउ गरेको हो ।
वडा प्रहरी कार्यालय बैदाम कास्कीबाट खटिएको प्रहरी टोलीले शान्ति सुरक्षा कायम गर्ने क्रममा उनीहरूलाई नियन्त्रणमा लिएको बताइएको छ ।
पुस १३ गतेदेखि सुरु भएको उक्त महोत्सवमा सडकमै मादक पदार्थ सेवन गरी उच्छृङ्खल गतिविधि गर्दै हिँड्ने, सिसाका बोतलहरू फुटाउने तथा एक आपसमा झै-झगडा गरी अशान्ति फैलाउने कार्यमा संलग्न भएकाले उनीहरूलाई पक्राउ गरिएको प्रहरीले जनाएको छ ।
जिल्ला प्रहरी कार्यालय कास्कीका सूचना अधिकारी एवं प्रहरी नायव उपरीक्षक हरि बहादुर बस्नेतले पक्राउ परेका १४ जना व्यक्तिहरूलाई नियन्त्रणमा लिई आवश्यक कारबाही प्रक्रिया अगाडि बढाइएको बताए ।
